Motor hlui thlak dan turah hriattirna tichhuak

Mizoram sorkar chuan State Transport Authority leh Mizoram sorkarin July 26, 2016-a an pawm tawh angin, mihring phur chi lirthei (commercial passenger vehicle)-te hman theih hun chhung kum bithliah a tichhuak a; lirthei hlui tawh, kum bithliah pel tawhte chu lirthei thara thlak tur a nih thu a tarlang.

Mihring phur chi lirthei hman theih hun chhung sorkarin a bithliah chu - tourist bus tan kum 8, tourist taxi tan kum 9, two wheeler taxi tan kum 10, three wheeler (auto-rickshaw) tan kum 10, local taxi/motor cab tan kum 10, maxicab tan kum 10 leh, city/town/line/bazar bus tan kum 10 a ni.

Sorkar ruahmanna thar hi bus tih loh, lirthei dangte chuan hriattirna chhuah hun, September 15, 2016 aṭanga thla ruk chhungin lirtheite chu a thara thlak hman ngei tur a ni a, bus erawh chu thla riat chhunga thlak tur a ni. Lirthei a thara thlak chu vawi khat atan chauh phal a ni a, hun tiam chhunga thlak lote chu an permit tihtawp tur a ni.

Lirthei a thara thlak turte chu motor awm ngei, permit leh docu-ment zawng zawng (registration certificate, tax, insurance, etc) nung lai a ni tur a ni a, lirthei leh registration certificate a inmil tur a ni.

Motor chetsual vanga siam ṭhat tlak loh, kum bithliah tling lo a thara thlak tur a nih chuan, police report, police station GDR number leh date, Motor Vehicles Inspector (MVI) report-te neih a ngai bawk.