Kum 2 chhungin politics thilah FIR 4 FIR pahnihah chargesheet thehluh a ni tawh

Aizawl district chhunga political party-a nihna nei te, party worker-te'n politics kaih-hnawihah kum hnih chhungin police-ah FIR pali an thehlut. FIR pali zinga pahnih chu police-in chargesheet tawhin Court-ah an thehlut tawh. Pakhat an chhui mek a, pakhat dang erawh FIR thehluttute'n an hnuh kîr leh avangin an titawp.

Vanglaini-in RTI Act hmanga kum 2014 aṭanga kum 2016, August 23 thlenga politics-a inhmangte'n politics kaihhnawiha FIR an thehluh leh police-te'n an bawhzui dan zawhna, Aizawl SP office-a SPIO-in a chhan dânin, politics kaihhnawiha police-a FIR thehluh pali zinga pahnih chu Congress party mite thehluh a ni a, BJP leh MNF mite'n pakhat ve ve an thehlut bawk. FIR pali zinga pathum chu social media kaihhnawih a ni.

FIR thehluttute chu, Congress party-a Human Right & Legal department secretary Christopher K Thanga leh Media department member VZ Kaia, BJP state secretary i/c Information & Publicity David L Sailo leh, MNF ṭhalai general secretary R Lalthlamuana leh MNF joint secretary PC Dailova te an ni.

FIR thehluh chhan

Christopher K Thanga hian April 13, 2014-ah Aizawl Police Station-ah FIR a thehlut a; FIR-ah chuan April 4, 2014 zana K Chhawnṭhuama'n TV-a thu a puan chhuaha EVM khawihchingpen anga a sawi leh Chief Minister Lal Thanhawla leh MPCC Media department a puhnate leh a kaihhnawih chungchang a ni. He FIR-ah hian police-te chuan IPC section 109, 505(1)(b), 120 leh IT Act hnuaiah thubuai an ziak lut.

BJP mi David L Sailo chuan Aizawl PS-ah tho January 20, 2015-ah FIR a thehlut a; FIR-ah chuan Beth Ce intiin Facebook-a Bible Society of India chungchanga thu dik lo a thehdarh leh sorkar laipuia BJP sorkar chungchangte a ziak. He FIR vang hian police-te chuan IPC section 500 leh IT Act section 66 hmangin thubuai an ziak lut a ni.

MPCC mi VZ Kaia chuan March 11, 2016-ah Aizawl PS-ah MNF joint secretary Zobiakvela lakah FIR a thehlut a; FIR-ah chuan March 3-6, 2016 chhunga Champhaia KṬP Geneneral Conference-a tel tura Chief Minister tel thu leh tel tura helicopter-a a kal dan chungchang WhatsApp group-a a tarlan chungchang a ni. Hei vang hian police-te chuan IPC section 419 leh IT Act section 66 hnuaiah thubuai an ziak lut.

MNF mi R Lalthlamuana leh PC Dailovate te chuan hming ziah hnan ve vein April 25, 2016-ah Chief Judicial Magistrate, Aizawl Judicial District hnenah criminal complaint an thehlut.

Complaint an thehluh chhan chu, April 23, 2016 zanah Zosanga inti, Zosangliana c/o Nghinglova, Khatla Chawnga Road-in WhatsApp group 'Zoram Today' ah, 'Chakmate hi kan Lallukhum khum tur a ni tia do tak anga lang. Remna an sign Memorundum of Settlement-ah chuan duhsak Vohbik No. 1-a daha ziah hnantu party MNF hi, hre teh un," tih ziaka a post vang a ni. He thilah hian Aizawl PS-ah IPC section 500 hmangin thubuai ziah luh a ni.

FIR bawhzui dan

Christopher K Thanga FIR thehluh chu bawhzui niin, police-te'n October 15, 2014-ah chargesheet an siam a, chargesheet no. 240 hmangin Court-ah an thehlut. David L Sailo-in FIR a theluhah pawh February 17, 2015-ah chargesheet no. 251 hmangin Court-ah thehluh a ni tawh.

VZ Kaia FIR thehluh chu case register a ni a, investigating officer ruat niin, chhui mek a nih avangin a dinhmun chu zawhna chhannaah pek tel theih a ni lo. R Lalthlamuana leh PC Dailova te FIR thehluh erawh chu an hnuhkîr avangin tihtawp a ni.

RTI Act hmanga dilnaah hian FIR thehluh a nih hnua hriatpuitute thil sawi chhuah (statement of witness) pawh dil tel a ni a; SPIO chuan, hriatpuitute thil sawi chhuah, Christopher K Thanga leh David L Sailo te FIR-a mi chu Court-ah thehluh tawh a nih avang leh VZ Kaia FIR thehluh chu chhui mek a nih avangin pek chhuah a rem lo tih a tarlang.