UDPA Minister leh AMC hotute an inkâwm
UDPA minister Zodintluanga chuan nimin khan a pisaah Aizawl Municipal Corporation (AMC)-a councillor-te a kâwm a, AMC councillor-te chu mayor PC Lalhmingthanga hoin an tel.
Aizawl khawpui tihhmasawnna tur scheme, Atal Mission for Rejuvation and Urban Transformation (AMRUT) hnuaia hmalak dan tur an sawiho.
Zodintluanga chuan, AMC councillor-te nen thawhhona ṭha tak an nei a, state sorkar leh AMC pawh ṭha takin an thawkho zel tih sawiin, lawmawm a tih thu a sawi a, "Thawhhona ṭha tak neih theih zel ni se ka duh," a ti.
PHE minister ni bawk Zodintluanga chuan PHE department kaltlanga Aizawl khawpuia kângmei chhuak venna tura hmalakna kal mek sawiin, "Khawpui chhunga kângmei chhuak vênna lamah ruahmanna thar siam a ni a, hmalak mek a ni. Khawpui chhunga motor kal theihnaah kângmei a chhuaha tui lâkna tur fire hydrant hmun 40-ah siamin rua-hmanna a kal mek," a ti.
Kângthelh motor-te tui an tlak-chhama hmun hla taka tui an lak ngai ṭhin sutkianna atan fire hydrant-te chu dah a ni thu sawiin, Zodintluanga chuan, Aizawl khawpuiah motor tlân theih lohna hmun a tam avangin kângmei a chhuaha hman theih turin tui lakna tur hmun 400 an rua-hman mek bawk a ni tih a sawi.
PHE Minister chuan, "AMRUT
aṭang hian tui pipe-a pressure kal na lutuk vanga meter chhia vênna atan pressure reducing valve siam mek a ni a, pipe ṭawp thenfai te, pipe pawhna cluster bawr lutuk tihkiam nana cluster dang siamte leh Greater Aizawl Water Supply Scheme Phase-I pipe Dihmunzawl
aṭanga Tuikhuahtlang inkar hlui tawh pipe thar veka thlakna atante hmalak mek a ni," a ti.
Aizawl mayor PC Lalhmingthanga pawhin thu sawiin, inkawmkhawmna leh thawhhona ṭha an neih avangin lawmawm a tih thu a sawi a; councillor dangte'n thu an sawi bawk.
Inkawmhonaah hian Aizawl hmasawnna tura bawlhhlawh paihte leh tui lâk kaihhnawih te, AMRUT kaltlanga hmalakna an neih tawhte leh hmalak zel dan turte an sawiho a ni.
AMRUT hi sorkar laipuia Ministry of Urban Development-in a din a ni a, prime minister Narendra Modi-a'n June 24, 2015-ah a hawng a ni.