Sport-ah kan la sâng lo - Sports Minister

Khelo India Youth Games, 2020-a Mizoram aṭanga infiammi tel, medal dawngte lawmpuina hun nimin khan Sports & Youth Services minister Robert Romawia Royte hoin a pisaah buatsaih a ni. Minister chuan, Mizoram chu sport-ah a la sân loh thu a sawi.

Sports Minister chuan, nihna pawm ngam a ngaih thu sawiin, "Infiamna lamah Mizoram hi kan la sang lo. Football-a kan chêt ṭhat avangin sport-a sang ta viaua inngaih tur a ni ngawt lo a, hmabak tam tak kan la nei. Khelo India, National Games leh a dangahte medal kan lak nual hnuah sport-ah hma kan sawn kan ti thei ang," a ti.

Mizo zingah Khelo India leh National Games khel pha an tam lo tih sawiin Robert Romawia chuan, "Hei hi sorkarin a en ṭha dawn. Khelo India khel tur chuan school games-ah chêt ṭhat a ngai a, National Games khel tur chuan Khelo Games-ah chet ṭhat a ngai. Qualifying aṭangin kan ngaih pawimawh a ngai a ni," a ti a; Mizo tam zawkin medal an lak theihna atan sorkarin hma a lak dawn thu a sawi.

SYS Minister chuan, infiammite'n hmunhma ṭha zawk leh ei leh in lam pawh ṭha zawk an dawn theih nan hmalak a nih dawn thu sawiin, "Ministry of Tribal Affairs chuan boxing-ah centre of excellence dinna atan cheng vbc. 5 a sanction tawh. Infiammite'n TA/DA an dawn ṭhin chu kan sorkar hnuah state chhungah Rs. 250 aṭangin Rs. 350-ah tihsan a ni tawh a, state páwnah chuan Rs. 400 a ni," a ti.

Khelo India Youth Games zawh tâkah Mizoramin gold medal 3, silver 2 leh bronze 5 a la. Games-ah khan discipline 20 a awm a, Mizoram chu discipline pasarihah an tel thei. Gold medal dawn theih awm zawng zawng chu 447 a ni a, Mizoram aṭanga infiammi kalte'n gold medal dawng vek pawh ni se 29 an dawng thei a ni.