HSLC 2025-a pakhatna hnenah scooter hlan

KD High School chuan an sikulin HSLC 2025-ah result an neih ṭhat avangin nimin khan Dawrpui Multipurpose Centre-ah an lawm a; an zirlai PC Lalṭhakimi, HSLC 2025-a pakhatna hnenah principal Biakhmingliana Pachuau-in lawmpuina atan scooter leh pawisa a hlan a, zirlai dangte hnenah pawisa leh thilpek dang an hlan bawk.

KD High School hian HSLC 2025-ah pakhatna an neih bakah, distinction mi 12, first divison-ah mi 17, second division 10 leh third division pakhat an pass a; kum 2023 leh 2024 HSLC-ah top ten-a tling an nei tawh bawk. Nimina result lawmna hi School Education director Angela Zothanpuii'n a hmanpui a ni.