ZPM Ṭhalaite'n thisen an pe

ZPM Ṭhalai chuan nimin khan ZPM party pisaah thisen pek rûnpui an huaihawt a, Civil Hospital, Aizawl tan thisen unit 51 an pe.

Blood donation camp ṭanna inkhawmah ZPM Ṭhalai president Jeje Lalpekhlua, MLA chuan, mi dang nun chhanna atana thisen pekah Mizo te, a bik takin ṭhalaite an ṭhanharh thar zel a ṭul thu a sawi a, "Kan vanglai, kan ṭhat lai ngeia mi dang tana malsawmna ni tura kan inpek ṭhinnate hi thil inchhîrawm loh tak a ni," a ti. tun aia zau zawk leh ruahmanna fel zawkin thisen pek an la huaihawt leh dawn thu sawiin, ZPM ṭhalaite chu mi dang tana malsawmna ni tura inpe deuh deuh turin a chah.

ZPM Ṭhalai Blood Donation Camp hi Assembly speaker Lalbiakzama, govt. deputy chief whip W Chhuanawma leh ZPM vice president C Lalnunnema te pawhin an hmanpui. Speaker chuan, "Thisen kan pek hian mi dang nunna chhanna atana kan hna hmasa ber a ni a, vawiina thisen petute hi nakina a mamawhtu kan la ni thei a, kan theih lai hian thisen pek i ui lo ang u," a ti.