India sipaite thlâwpna lantirna atan BJP-in kawngzawh an huaihawt dawn

BJP, Mizoram Pradesh chuan India leh Pakistan inbeihnaa ram tana theihtawp chhuahtu India sipaite zahna leh thlâwpna lantir nan vawiin Nilaini hian Aizawla War Memorial leh Vanapa Hall inkarah kawngzawh huaihawt an tum a, tel turin Mizoram mipui an sâwm.

Mizoram BJP president Vanlalhmuaka chuan kawngzawh huaihawt an tum chungchangah nimin khan ngenna a tichhuak a; India sipaite zahna leh thlâwpna lantir nan vawiin chhun dar 12 hian Treasury Square-a War Memorial aṭanga Vanapa Hall kawt thleng kawngzawh huaihawt an tum thu a puang a ni.

Vanlalhmuaka chuan, India leh Pakistan indonaah hian Mizo tlangval eng emaw zat rál hmatâwngah an awm tih sawiin, "Kan ram tan zan mu lo leh thih huamin rál an do a ni. Rál hmatáwnga awm Mizo tlangval sipai huaisen chhung te, ex-service leh NGO te, party hrang hrangte leh Mizo mipuite he kawngzawh hi party bil awm loa India mi kan nih anga buatsaih a nih angin lo tel vek turin kan sawm che u a ni," a ti.

BJP President chuan, Operation Sindoor-a rál hmatawnga awm India sipai, Mizo tlangvalte zahna chibai an bûk a, Mizorama kohhrante leh mipuite'n an ṭawngṭaipui reng tih a sawi a; mi firfiakte thlâwptu Pakistan-in an pawikhawih nasa tak avangin an tuar ngei tur a ni tih chu an dinna a nih thu a sawi bawk.