Sorkar hnaah group C-ah post ruak a tam ber

Mizoram sorkar hnuaia hna - group A, B, C leh D-ah sanctioned post 73,808 a awm a, March 4, 2025 dinhmun angin post awm zinga 61.36% hnawh khah niin, post ruak 38.64% a awm. Poast ruak group A-ah a tlem ber a, group C-ah a tam ber.

Mizoram sorkarin March 4, 2025-a 'Statement on Salary & Employment Data in Government, PSUs and Aided Institutions (2025-2026)' a tihchhuaha a lan danin, Mizoram sorkar hnuaiah group A, B, C leh D-ah post 73,808 a awm a, chu'ng zinga 45,288 (61.36%) chu hnawh khah niin, post ruak 28,520 (38.64%) a awm.

Post 73,808 zinga 34,128 (46.24%) hi permanent post a ni a, post 39,680 (53.76%) chu temporary post a ni.

Mizoram sorkar (government, PSU leh aided institution) hnuaiah hian group A bikah sanctioned post 7,782 awmin, post 5,562 (71.47%) hnawhkhah a ni a, sanctioned post awm zat aṭanga chhuta hnawhkhah tam ber a ni. Group B-ah sanction post 30,917 zinga 19,784 (63.99%), group C-ah sanction post 22,162 zinga 12,186 (54.99%) leh group D-ah sanction post 12,947 zinga 7,756 (59.91%) hnawhkhah a ni bawk.

Sorkar hnathawk hrang hrang zingah group C hnuaiah post ruak a tam ber a, sanctioned post zawng zawng aṭangin post ruak 45.01% a awm. Group A hnuaiah post ruak 28.53% awmin, post ruak a tlem ber a ni.

Permanent post 34,128 zinga 19,912 (58.35%) hnawhkhah a ni a; permanent post zingah hian group A post hnawhkhah tam berin, sanctioned post 3,214 zinga 2,273 (70.72%) hnawh khah a ni. Temporary post 39,680 zinga 25,376 (63.95%) hnawhkhah a ni a, post hnawhkhah tam ber chu group A bawk niin, sanctioned post 4,568 zinga 3,289 (72%) hnawhkhah a ni.

Permanent post zingah group B post 14,318 zinga 8,035 (56.12%) hnawhkhah niin a tlem ber a; temporary post zingah group C post 12,861 zinga 6,947 (54.02%) hnawhkhah niin a tlem ber bawk.