Solo Art Exhibition buatsaih ṭan

Information & Public Relations department leh Mizoram Art Development Society chuan nimin khan Vanapa Hall-ah Vanlalzarzova Solo Art Exhibition an buatsaih a, IPR secretary Betsy Zothanpari Sailo-in a hawng.

Solo Art Exhibition-ah hian Vanlalzarzova, Upper Republic kutchhuak lemziak ṭhahnem tak târ chhuah a ni a, May 17, 2025 thleng mipui tlawh theih leh lei theih a ni ang.

Exhibition hawnna inkhawm hi MADS vice president Lalṭanpuia'n a kaihruai a; Betsy Zothanpari Sailo chuan, artist thiam tak tak Mizoramin a neihte a theih ang anga chawi kân a ngaih pawimawh thu sawi leh exhibition chu mipuiin an hlutsak ngei a beisei thu a sawi.

IPR Secretary chuan, technology hmasawn zelah artificial intelligence (AI) hmangin awlsam takin lemziak nalh tak tak siam theih a nih thu a sawi a, "AI hmanga siam tam tak karah hian mi zawng zawngin an siam chhuah ve theih loh mihring kutchhuak nge nge hi a hlu zawk a ni," a ti.