Sericulture demonstrator lak dan chhui turin MZP-in sorkar an phût

MZP Gen. Hqrs chuan Sericulture department-a demonstrator post 4 lakna tur exam-ah thil dik lo a awm ngei niin an hria a, May 21, 2025 ral hmain thil thlen dan chhuitu tur Inquiry Committee din turin sorkar an phût.

Sericulture demonstrator tur lakna exam buatsaih chungchang hi MZP Gen. Hqrs hruaitute chuan nimin khan MZP Pisapuiah an ngaihtuah a; thuchhuah siamin, "May 21, 2025 (Nilaini) ral hma ngeia hna lak dan chhui chiang tur Inquiry Committee din turin sorkar kan ngen a ni," an ti.

MZP chuan, Sericulture demonstrator tur lakna exam-ah mi ṭhenkhatin exam hall-ah mobile phone keng lutin, Paper-I (English leh General Knowledge) entawn an awm ngeia an hriat thu an tarlang a, "Hetianga hna lak dik lo hi exam beitu ṭhenkhatte'n complaint mah se, kaltlangpui luih a ni," an ti a; dik lo taka hna lak chu chhui chiang vat turin an ngen a ni.

Hna lakna kalpui dan chu Mizoram Direct Recruitment (Conduct of Examination) Guidelines 2018-a Sl. No. 24 - Instruction to Candidate leh Sl.No. 27 - Duties of Invigilator nen inkalha an ngaih thu MZP chuan an sawi bawk.

MZP tarlan danin, Sericulture demonstrator pali lakna atan hian February 17, 2025-ah advertisement tihchhuah a ni a, dilna lut zinga 41 pawm niin, mi 14 hnâwl an ni. April 8-9 chhungin exam buatsaih niin, mi 38 an inlan a; mi 32 chu personal interview tura koh niin, May 7-ah interview neih a ni. Mi 32 aṭangin demonstrator tur mi pali thlan an ni a, May 8, 2025 khan appointment pek an ni.