RD dept leh BRLF ten MoU an ziak

Rural Development & Administration minister Prof. Lalnilawma hoin nimin khan a pisaah Rural Development & Administration (RDA) department leh Bharat Rural Livelihood Foundation (BRLF) ten thawhhona thuthlung, memorandum of understanding (MoU) an ziak.

Thuthlung hi thingtlanga khawsak harsate chhawmdawlna kawnga chak zawka hmalakna tura duan a ni a, kum 3 chhung atan ziah a ni. MoU-ah hian RDA department aiawhin additional secretary V Lalengmawia'n hming a ziak a, BRLF aiawhin chief executive officer Kuldip Singh-a'n hming a ziak.

MoU ang chuan central scheme hrang hrangte awmze nei zawka kalpui a nih theih nan RDA department leh BRLF an thawk dun dawn. BRLF hian Natural Resource Management hnuaiah - tuihna humhalh, ramngaw leh nungcha humhalh leh loneitute thar chhuahahte thingtlang mite'n hma an sawn theih nan department hrang hrang leh scheme awmte hmanga thawhho (convergence) dan tur ruangám a siam dawn a ni.

Thawhhona hnuaiah hian thingtlang loneitute tan tui luang ral tur humhalh te, hlâwk zawka lei chhung tui enkawlna an neih theihna tur leh, non-pesticide management-based agriculture nasa zawka kalpui theih nante hmalak a ni dawn a; BRLF-in a ṭul angin loneitute training an neihpui ṭhin bawk ang.

MoU ziahnaah hian RDA secretary R Zarzosanga, MzSRLM chief executive officer Zosangzuali leh sorkar hotu dangte an tel a ni.