KHAWTHLIR
CBSE result chhuak
Central Board of School Education (CBSE) chuan nimin khan pawl 10 leh 12 result a tichhuak a; CBSE zawmtu Mizoram Institute of Comprehensive Education (MICE)-in pass percentage 81.29 an nei. MICE hian pawl 10-ah candidate 20 neiin, an hlawhtling vek a; pawl 12 Arts-ah candidate 51-te an pass vek a, Science-ah zirlai exam 68 zinga 42 hlawhtlingin, pass percentage 61.76 a ni.
Blackout hmang
India leh Pakistan buaina thleng mekah Mizorama inrálrinna leh mipui himna tura inhmakhua nan May 12, Thawhṭanni zan khan Kolasib leh Vairengte-ah air raid mock drill blackout hun hman a ni. Zan dar 8:59-ah khan rálkhèl dár (siren) tihrik a ni a, dar 9:00-9:04 chhungin êng tih thim niin, lirthei tlante pawh dintir a ni. Blackout hi mipuiin an zâwm ṭha hle niin sorkar thuchhuahin a tarlang.
Rev. Vanlalfela a thi
Mizoram UPC general superintendent hlui Rev. Vanlalfela Sailo (78) chu nimin zing dar 3:25 khan Ebenezer Hospital-ah a thi a, nimin chawhnu khan Chawlhhmuna an inah vui a ni a, amah sûn nan Mizoram UPC pisa khâr a ni. Rev. Vanlalfela hi Mizoram police-ah kum 15 a thawh hnuah kum 1987-ah pastor a ni ṭan a; kum 25 pastor a nih chhungin bial pasarih a vawn bakah, general superintendent, general secretary, ATI Board chairman leh nihna pawimawh dangte a chelh a ni.
Inven dan inzirtir
Mamit District Disaster Management Authority chuan nimin khan village disaster mangement committee-te tan Mamit, Reiek, Zawlnuam, West Phaileng leh Kawrtethawveng khuaahte chhiatrupna a thlen palha chêt lak dan tur leh chhiatna laka invên dante inzirtirna an buatsaih. Inzirtirnaah hian VC aiawh pahnih leh NGO hrang hrang aiawh mi pakhat ṭheuh an tel a ni.
Bonsai zirho
Champhaia Bonsai Association of Mizoram chuan May 12, Thawhṭanni khan Bonsai Association of Mizoram kum 10 tlin lawm nan New Champhaiah Bonsai Training cum Workshop an buatsaih a, Champhaia Horticulture officer Lalrinchhani'n a hmanpui.