Sorkarin gas a phur dawn Harsatna a kian beisei a ni

Indian Oil Corporation (IOC) Ltd. hotute chu nimin khan Food, Civil Supplies and Consumer Affairs (FCSCA) minister John Rotluangliana hoin Secretariat Conference Hall-ah Mizorama gas harsatna thleng mek sutkian dan tur an sawiho. IOC hotute chuan Mizoram sorkar (FCSCA) department chu gas harsatna phuhrûk turin gas phurh an phalsak.

Supply secretary Dr Franklin Laltin-khuma'n Vanglaini a hrilh danin, IOC hotute chuan Mizorama gas harsatna thleng mek phuhrûk turin Mizoram sorkar hnenah phalna a pe a; a hmain gas distributor-te chu gas phurh phalna a lo pe tawh bawk.

Gas phur tur hian truck-ah vehicle tracking system (VTS) leh anti-lock braking system (ABS) vuah a ngai a; mahse, hei hi IOC-te chu gas harsatna phurhru tura hmalak chhung bikah chuan a ngaihhnathiam dawn a, VTS leh ABS-te hi vuah kher a ngai rih dawn lo.

Dr Franklin Laltinkhuma chuan, sorkarin gas a phurh theih nan hian vawiinah IOC -ah ziakin a thlen dawn tih a sawi a, "Sorkar chuan harsatna zualpui chhung chauh kan phur dawn a, kar leh Thawhṭanni aṭang chuan kan phurh ṭan theih a beiseiawm," a ti.

IOC-in gas agency-te gas phurh a phalsakah hian, VTS chu thla khat chhung a ngaihnathiam dawn a, thla khat ral hnuah erawh chuan an vuah ngei tawh a ngai dawn. ABS erawh chu himna atan vuah nghal a ngai thung.

Meeting-ah hian FCSCA Secretary chuan dan pangngaia Mizoramin thla khata a bur 1,20,000 a hmu ṭhin chu Mizoram mipuiin an kham tawh lo tih sawiin, pek belh turin a ngen a; IOC hotute chuan kumin November leh December thlaa bûr 1,50,000 ve ve an pek tur thu an sawi.

Supply Secretary sawi danin, tun dinhmunah Mizoramah gas distributor 33 an awm mek a; nimina meeting-ah hian distributor 33 pek belh turin ngen nghal mah se, IOC hotute chuan an tiam thei lo a, hmunpui lam aṭanga ngaihtuah a ngaih thu an sawi. Distributor dah belh tur hian Chief Minister pawhin IOC hotute a lo ngen tawh a ni.

Dr Franklin Laltinkhuma chuan, gas transporter pathumte chu IOC-in show cause notice vawi hnih an pe tawh a, vawiin hian Mualkhang Bottling Plant-ah an ko leh dawn tih a sawi a, "Transporter-te hi IOC chuan black list a tum mek a, an black list a nih chuan kum thum chhung an suspend ang," a ti.

Meeting-ah hian IOC aṭangin executive director Dipankar Roy, chief LPG manager (NE) Bimal Patnaik, senior manager (LPG operation) Pankaj Bhattacherjee, senior area manager JK Brahma, LPG manager (Mizoram) C Lalpekliana, LPG sales officer Martin Gangte leh Mualkhang Bottling Plant manager Ranjit Bhasumatary-te an tel.

Mizoram sorkar aṭangin FCSCA secretary Dr Franklin Laltinkhuma leh officer dangte an tel a; gas agency neitu te, Central YMA hruaitute leh Mizoram Consumer Union hruaitute an tel bawk.