MNF-in stamp duty tihniam turin CM ngen

MNF Vigilance department chuan October 18, 2016 khan Chief Minister hnenah stamp duty tihniam tura rawtna leh ngenna lehkha an thehlut. Stamp duty chungchangah hian Union Minister leh Mizorama Revenue Minister thu a inkalh niin an tarlang.

MNF lehkha thehluh-ah chuan, ‘The Indian Stamp (Mizoram Ament-ment) Act 2007’ (Act No.11 0f 2007) anga stamp duty Rs. 500 aia tam lo lak ṭhin chu tun hnaia nasa taka tihsan a ni tih ziakin, "Mipui pek tur chhiah hetiang em ema vawi leh khata tihsan hi khawi ramah mah a la thleng ngai lo a, mipui tan phurrit nasa tak a nih avangin MNF chuan ṭha kan ti lo," an ti.

Chhiah tihsan hrim hrim chu an do lo tih sawiin MNF chuan, "Mipui phurrit lutuk tura thâwk leh khata nasa taka tihsan erawh chu ṭha kan ti lo a, mipui harsatna hrethiam a, stamp duty leh registration fee rate thar hi ennawn a, siam ṭha turin kan phut a ni," an ti a; tihniam dan tura rawtna point hrang hrang an thlen a ni.

MNF thuchhuah chuan Mizoram Assem-bly House-ah stamp duty tihsan rawtna ngaihtuah-naah Land revenue & Settlement Minister-in, 'Sum tuakna ṭha tak a nih avangin' tih lam hawiin a sawi niin a tarlang.

Chutih laiin, Union Urban Development Minister Venkaiah Naidu chuan tun hnaia state chief minister-te hnena stamp duty tihniam turin lehkha a thawn a; stamp duty chu a tirah register bu senso buaipuina atan chauh a tih a ni ṭhin a, tunah chuan mipui tana phurrit tling khawpin state revenue peipun nana hman a ni ta chu ṭha lo a tih thu leh tihniam tura a ngenna thu a thawn darh niin an tarlang a; "Mizoram Revenue Minister leh Central Minister thu hi a inkalh tlat a ni," an ti.