AR-in Expedition for Peace buatsaih

Assam Rifles-te chuan nimin khan Lammualah 'Expedition for Peace' an buatsaih. He mi puala inkhawm hi chief minister Lal Thanhawla'n a hmanpui a; inkhawm zawhah AR football team leh bethlehem Vengthlang Football Club-te an inkhel.

Chief Minister chuan, Assam Rifles-te'n Mizo mipuite nena inlaichìnna ṭha nei tura hma an lakna chu fakawm a tih thu a sawi a; inṭhian ṭhatna tura football friendly match buatsaih a ni chuan rah ṭha a chhuah ngei a beisei thu a sawi.

Lal Thanhawla chuan, Expedi-tion hmang tura Mizoram tàwp, Parva aṭanga ni nga thanga AR sipaite an rawn kal chu fakawm a tih thu a sawi a; Mizoram sorkar leh Assam Rifles-te'n thawhhona ṭha tak an neih thu sawiin, "1st. Assam Rifles-te Mizorama an rawn awm tirh ata tun thlenga thawhhona ṭha tak a awm thei hi a ropui hle a ni," a ti.

CM Hawla chuan, "AR-te hi medical health lamahte kan ṭang-kaipui em em a, anni vang hian Mizo ṭhalai tam takin AR an zawm theih phah a ni," a ti a; Mizo mipuite leh Assam Rifles-te inkarah thawhhona ṭha awm zel se a duh thu a sawi bawk.

Assam Rifles-a Inspector General (East) chuan Parva aṭangin Expedition for Peace hi an ṭan a, Lunglei, Serchhip leh Champhai te an tlawh tawh a, nimin khan Aizawl an rawn thleng a ni. IGAR hnuaia state pathum - Mizoram, Assam leh Tripura-te an fang kual mek a ni.

Expedition neih mek pual hian 39 Assam Rifles-te chuan mipui nena inpawhna ṭha siam nan Motor Cycle-cum-Gypsy Expedition an buatsaih leh dawn a, Seling aṭanga Zokhawsang ram thleng tlân tur a ni ang.

39 AR-te hian an motto 'Tlâng mite ṭhian' tih chu tihlawhtling turin kawng hrang hrangin hma an la tawh a; Zemabawk ram, Zokhawsanga an hmun turah Swachh Bharat Abhiyan te, Go Green Drive leh Volleyball match-te an lo buatsaih tawh a; hengahte hian tualchhung mi 600 chuang an tel a ni.