Kawng chhia vangin maxicab an tlân lo

Mizoram khawthlang lam, Tlabung leh a chhehvel khaw hrang hranga tlan maxicab-te chu Lunglei
aṭanga an khaw panna kawng chhia vangin nimin aṭang khan an tlân lo a, tun kar chhung an ding dawn nia thu dawn a ni.

Thu dawn danin, kawng chhia vang hian Tlabung leh a chhehvel leh Lunglei inkara tlan maxicab-te bakah, Aizawl leh Silchar lama tlan ṭhinte pawh an chàwl vek a; Tlabung leh Chawngte inkara maxicab service erawh kawng chhiat vang thoin hun eng emaw chen kal ta aṭang khan an lo ding tawh a ni.

Tlabung leh a chhehvela tlan maxicab ding zat hi 21 an ni a, hei vang hian Tlabung leh a chhehvel mipuiin harsatna an tâwk nghal. Maxicab-te hi tun kar Inrinni thleng din an tum avangin, sorkar lam aṭanga ruahmanna siam a nih loh chuan harsatna lian zawk tâwk thei an nih thu an sawi. Tlabung leh Lunglei inkar hi km. 97 a ni a, tunah chuan darkar 8-9 an tlân tlangpui.

Hetih lai hian, Lungleia truck-te pawh Tlabung lam kawngah an la tlân lo zel a; truck-te'n buhfai an dah loh avang hian Chawngte khuaa retailer-te chuan October 18, 2016 aṭang khan meilawng hmangin Tuichawng buhfai an la lût ṭan a ni.