CM-in Science & Technology in thar a hawng

New Secretariat Complex-a Science & Technology office building thar chu nimin khan chief minister Lal Thanhawla'n a hawng. CM chuan, "Ram dangte ke pên ruala kê kan pên theih nan science thiamna kan hman ṭangkai zel a ngai," a ti.

Chief Minister chuan, science leh technology chu a ṭhan zel avangin ram dangte ruala ke pên ve turin science thiamna hman ṭangkai a ngaih thu sawiin, "Ram danpui Article 51A-in khua leh tui te chu science leh a hnathawh tana theihtawp chhuah tur thu a dah hian ramin science leh technology a dahsanzia a tilang," a ti. Science leh technology tel loin hmasawnna a thleng thei lo tih sawiin, Mizote zingah scientist leh mathematician tia koh theih mithiam an awm chu lawmawm a tih thu a sawi.

Zirna lamah hma sawn hle mah ila sorkar hnain mi zawng zawng a daih lo tih sawiin Lal Thanhawla chuan, "Science leh technology thiamna hman ṭangkai dante ngaihtuahin, mahni kea din tumin self employment lamte kan hawi a pawimawh tawh a, chutiang zawnga inbuatsaih a ngai a ni," a ti.

Chief Minister chuan, Directorate of Science and Technology-in an puala in thar an nei ta chu a lawmpui thu a sawi a; in thar chu science leh technology thiamna hmanga Mizoram hmasawnna tura inbuatsaih hmun a nih ngei a beisei thu a sawi bawk.

State Planning Board vice chairman H Liansailova pawhin thu sawiin, "Tunlai khawvel hmasawnna hi hmasawnna tluan-tling, ṭhangtharte tana chhenfâkawm hnutchhiah a ngai a, scientific temper leh approach a ṭul. Kan hmasawnna hi thil thar hmuhchhuah ai mahin, thil awm sa changtlung leh ṭha zawka buatsaih thiamna a ni mah tawh a, he lamah hian ṭan kan lak nasat a ngai dawn a ni," a ti.

Planning secretary (Science & Technology) Dr C Vanlalramsanga chuan, in tharah hian Science & Technology-a thawkte bakah, Science & Technology hnuaia Mizoram Remote Sensing Application Centre (MIRSAC) leh Mizoram Science, Technology & Innovation Council (MISTIC)-a thawkte pawh an awm dawn thu a sawi.

In thar hawnnaah hian kar hmasaa Mizoram Science Congress hmasa ber neiha exhibition-a lawmman dawngte'n an model leh khawl an siam chhuahte an pholang a ni.

Science and Technology building thar sak dan sawitu PWD chief engineer (Building) Lalmuankima Henry sawi danin, in hi Special Plan Assistance aṭanga
sum hmuh hmanga sak a ni a, basement nen chhâwng ruk niin, sq.metre 2178.98-a zat a ni. A sakna atan cheng nuai 623.82 hman a ni a, a satu contractor chu Sangpuia, Chanmari, Aizawl a ni.

A hawnna inkhawmah hian minister pahnih - PC Lalthanliana leh C Ngunlianchunga, parliamentary secretary pathum - KS Thanga, K Lalrinthanga leh H Zothangliana te leh, Mizoram University vice chancellor Prof. R Lalthantluanga te pawh an tel.