Bru hruai kîr dan tur Lungleiah sawiho

Lunglei District Level Core Committee chu October 18, 2016 khan Lunglei DC pisaah Home department-a joint secretary Lalhriatpuia hoin an
ṭhukhawm a; Mamitah pawh nimin khan DC Conference Hall-ah District Level Core Committee an ṭhukhawm a, an chairman Lalbiaksangi, Mamit DC-in a kaihruai. Meeting-ah hian November 1, 2016 aṭanga Bru lâk lêt hna thawh riatna kalpui tur an sawiho.

Lunglei leh Mamita meeting-ah hian, Tripura aṭanga Bru hruai kîrte chenna tur hmun siamsak te, an kal dan tur leh ei leh in pek dan tur te, an awmna tur khua ṭheuh enkawltu tur administrative officer ruat leh venhimna pek dan tur te, a thlawna damdawi sem tur leh damlo enkawlna te, tui in tur thianghlim leh kawlpetha pek dan turte an sawiho a ni.

Lunglei district-ah hian Bru-te chu khaw pali - Putlungasih, Bûknuam, Dinthar leh Chàwilung-ahte dah tum an ni a; an vaiin chhungkaw 223 an ni. Bûk-nuamah chhungkaw 11, Putlungasihah chhungkaw 91, Dintharah chhungkaw 81 leh Chawilung South-ah chhungkaw 50 dah tura ruahman siam a ni.

Mamita meeting-ah hian Bru hruai kir hna thawh turah Mamit district-a YMA group hrang hrangte chuan, Mizoram mi leh sa ngei rawn lêt turte chu lawm taka an lo dawnsawn tur thu leh, boruak ṭha tak hnuaia lak let hna kalpui an duh thu an sawi.

Meeting-ah hian Committee member-te bakah, district chhunga YMA group president te, Joint V/C hruaitu te, political party hrang hrang hruaitute leh MZP hruaitute an tel.

Mamit district-a Bru lak let turte chu ruahman lâwk ang chuan chhungkaw 3,699 an ni a, anmahni lo buaipui turin an chen lailâwkna tur leh administrative officer-te ruat a ni tawh. Bru hruai kîrna atan hian Kânhmunah facilitation centre siam a ni dawn a; Mamita Mangkhawngdai khelmual leh Suarhliapahte staging area siam tum a ni bawk.

Bru hruai kirna atan hian Ministry of Home Affairs aṭangin cheng nuai 500 hmuh a ni a, State Level Coordination Committee chuan sum hman dan tur kimchang a ruahman ang. Bru lak let turte chu Lunglei, Mamit leh Kolasib district-ahte dah tum niin, an awmna tur khuate pawh thlan vek tawh a ni a; lak letna atan DPAR-in liaison officer tur MCS officer-te a ruat ang.