Lunglei district-ah ni 72 inhlawhna siam

District Development Coordination and Monitoring Committee (DISHA) chu October 18, 2016 khan Lunglei DC Conference Hall-ah an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP-te hoin an ṭhukhawm a; kum 2015-16 chhungin Mahatma Gandhi National Rural Employment Guarantee Scheme (MGNREGS) hnuaiah ni 72 inhlawhna siam a nih thu an tarlang.

CL Ruala chuan, sor-karin sum tam tak sêng kawng hrang hrangin hmasawnna turin hma a la tih sawiin, sumte chu dik taka hman a ni nge ni lo tih endik tur an nih thu a sawi a, "Theihtawpa
ṭan kan lak chuan mipuiin hma an sawn dawn a, Mizoram pawhin hma a sawn zel dawn a ni," a ti. Ronald Sapa Tlau chuan, mipui rilru sûk-thlêk thlak a ṭul thu sawiin, ram changkang apiangin kut hnathawh an zahpui loh thu a sawi.

Meeting-a tarlan dan-in, Lunglei district-ah PMGSY hnuaiah kawng panga, km. 51.39-a thui siam mek a ni a, Swachh Bharat Mission (Gramin) hnuaiah mimal inthiarna - Individual Household Latrine (IHHL) 128 leh Swachh Bharat Mission (Urban) hnuaiah IHHL 50 sak zawh tawh a ni.

National Rural Drinking Water Programme (NRDWP) kaltlangin Marpara South, Rângte leh Lungchemah tui lakna siam zawh a ni tawh a; Pradhan Mantri Krishi Sinchayee Yojana (WD) hnuaiah cheng nuai 1363.5 hmuh aṭangin nuai 744.4 hman tawh a ni. Pradhan Mantri Awaas Yojana (Gramin) hnuaiah mi 4,308 thlan niin, kum 2016-17 chhungin mi 708 hnenah in sak ṭanpuina pek tur an ni a; PMAY-Urban hnuaiah mi 4,255 thlan an ni.

Sikul naupang chawchhun scheme aṭangin sikul 28-ah kitchen-cum-store siam a ni a, SSA kaltlangin zirlaite hnenah zirlaibu leh uniform sem a ni. National Social Assistance Programme (NSAP) hnuaiah mi 5,787-ten hamṭhatna an dawng mek bawk.

Meeting-ah hian Lung-lei district aṭanga thlan MLA pali - S Lal-dingliana, Joseph Lalhimpuia, John Siamkunga leh Chalrosanga Ralte te an tel a ni.