Mob rule chungchangah thuchhuah siam Lunglei Court khawih vangin mi 30 man tawh

Superintendent of Police, Lunglei chuan mipui lungawi lo punkhawm leh pawi khawihna thleng (mob rule) chungchangah thuchhuah a siam a; September 22, 2016-a Lunglei Zohnuai mipuite'n Lung-lei District Court leh judicial quarters an khawih kaihhnawihah Lunglei Police Station-ah thubuai ziah luh a ni a, mi 30 man an ni tawh tih a tarlang.

Lunglei SP chuan, August 27, 2016 zana Stephen Lalchawiliana’n C Lalsawmliana, Zohnuai a vih hlum vanga Zo-hnuai mipuite'n September 22, 2016-a Stephen Lalchawiliana hmél hmu duha District Court kawtah an pungkhawm chungchang tarlangin, "September 21-ah CJM-in District Jail-ah camp court a neih tawh avangin, Stephen Lalchawiliana hi September 22-ah Court-ah hruai a ni lo," a ti.

SP chuan, mipuiin Stephen Lalchawiliana hmel an hmuh theih loh vanga CJM lakah lung-awi loin CJM chu an tâwng ta chiam tih sawiin, "Lung leh leirawhchan hmangin Court building dar-thlalang tam tak vawm chhiat niin, police-te nen in--nawrin buaina hial a chhuak a. A hawklak zual mi 50 vel chuan CJM quarters bei leh in, a bung--rua suasam leh tih-chhiat a ni," a ti a; he thil thleng vang hian mi 30 man an ni tih a tarlang.

Mi tu pawhin thil sual ti se, India dan hnuaiah a chungthu rèl a, a phu tâwk hremna pek tur a ni tih sawiin, SP chuan, "Diriam leh deusawh, tualthattu/pawikhawihtu hmuh kher tumte leh thah ve mai pawisaklohnate hi dan palzûtna vek a ni," a ti a; tharumin buaina a chingfel lo tih sawiin, tualthattu/pawikhawihtu chîl hlum ve leh maite chuan tualthahna dang a siam belh thei tih hre tur leh pawikhawihtu an huat em emte nen dang-lamna a awm lo tih hre turin mi tinte a chah.

Mipuiin pawikhawihtu hmel hmuh an tum ṭhin chuan police hnathawh nasa takin a tibuaiin a ti-
ṭhuanawp thei tih sawiin, Lunglei SP chuan, "Court-in rinhlelhna awm miah loa a titu finfiahna police-in an pek a phût a. Finfiahna zawn kawngah mipuiin boruak an neih ṭhinin harsatna a thlen ṭhin," a ti.

Lunglei SP tarlan dan-in, mimal leh sorkar bungrua tihchhiat chu dan kalh a ni a, kum hnih thleng jail-a tàn theihna a ni. Mei leh puakthei thil hmanga mi bungrua tihchhiatsak chu kum 7-10 tàn theihna a ni a; police duty tihbuai emaw, an duty tibuai zawnga khawsak chu bail theih loh thubuai siam theihna niin, kum hnih thleng tàn theihna a ni. Dan kalha mipui punkhawmnaa tel hrim hrim pawh tàn theihna a ni bawk.

Zirlai, hna zawng mek-te leh sorkar hna-thawk tan criminal case neih a hlauhawm zual tih sawiin, SP chuan, "Criminal case-a convict tawh nih chuan sorkar laipui leh state sorkar hnuaiah eng hna mah an thawk thei tawh lo a, fimkhur a
ṭul hle. Sorkar hnathawkte darkar 48 aia rei an tàn emaw, thubuaia thiam loh chantir an nih chuan suspend anga ngaih nghal niin, an hna hial chân phah theihna a ni," a ti.

Lunglei SP chuan, misual hnu chhuina leh a hremna chu dan kutah dah tur leh police-te ṭanpui
ṭhin turin mipui a ngen a; police mamawh petuah leh thuhretua ṭang hreh lo turin a chah bawk.