Inkhârkhip dan tur tihchian a ni Hna thawk thei leh thil lak luh theih a pung
State Level Task Force (SLTF) nimina an chairman Lalnunmawia Chuaungo, chief secretary hoa Secretariat conference hall-a ṭhukhawm chuan inkharkhip pawhsei chhunga tih theihte leh tih phal lohte an tichiang a; ruahmanna thar ang chuan, hna thawk thei leh state páwn aṭanga bungraw lak luh theih tih belh a ni.
SLTF-in a duan dan chuan, inkhàrkhip chhungin international boundary leh state boundary khâr zel a ni dawn a; Bairabi leh Vairengte paltlang kawngpuite erawh chu phalna nei bungraw phur lirtheite tan hawn chhunzawm a ni ang. Mipui zin veivahna lirthei erawh chu khap zel a ni a, ramri-ah khauh taka duty zel tur a ni bawk.
State páwn aṭanga bungraw lak luh theih zingah ni tin mamawh (essential commody)te chu phalna hranpa lâk ngai loin lak luh theih a ni dawn a, Vairengte SDO(Civil) emaw Bairabi SDC emaw hnenah declaration (prescribed form hmangin) an thehluh a ngai. Ni tin mamawh ni lo, ei leh bar zawnna leh hmasawnna atana mamawh bungrua - steel, cement, brick, balu, insakna bungrua, etc. lak luh phal a ni a, dilna form siam hmangin Home department phalna lak hmasak a ngai thung.
Mizorama thil siam, ran vulh leh thlai/thei tharte chu Mizoram chhung hmun hrang hrangah phurh chhuah ṭanna tur district-a DC phalnain thawn chhuah theih a ni dawn. Bungraw lak luh leh thiar chungchangah mobile application siam a ni dawn a, peih a nih veleh ruahmannate hi a ṭul anga tihdanglam a ni ang.
Biak-in, zirna-in, intihhlimna hmun, picnic spot, movie theatre, gym, community hall, restaurant, shopping complex, mall leh intàwllènna hmunte khâr zel tur a ni a; mitthi vuinaah mi 20 aia tam pun khawm phal a ni lo. Sorkar hnathawk group A leh B-te chu pisa kai vek tur a ni a, group C leh D-te erawh chu hmun thuma ṭhena hmun khat zelin an inkal chhâwk ang. Pisa chhungah phalna la hmasa loin páwn lam mi luh phal a ni lo.
Hmasawn nana hnathawh ṭul - lungrem, tui luankawr leh kawng siam, in sak, kawng laih, lei dawht e chu hna awmna district bawrhsapte remtihna lain thawh phal a ni a; hna thawk turin state chhunga awm sate chauh rawih phal a ni. Lo neitu leh huan neitu te, ran vulhtu te, sangha dil neitute leh thawktute chu phalna lak ngai loin an hna thawh phalsak an ni a, mi tam thama thawhho erawh a rem lo, hmun khatah mi panga aia tam awm khawm khap a ni.
Electrician, plumber, mechanic, thing leh cement mistiri leh helper-te chu an hnathawhna local task force-te hriatpuinain hna thawh phalsak an ni. DC phalnain quarry-a lung lak, leirawhchan leh block siam, rawra her leh chhut, thingzai khawla thing zai phal a ni a; DC phalna vêkin courier service, e-Commerce leh home delivery service hmanga ni tin mamawh, a bikin ei leh in tur, damdawi leh a kaihhnawih thil pe chhuaktute'n hna an thawk thei dawn bawk.
PHALNA LA LOA CHE THEITE
• Damdawi-in, nursing home, clinic, labo ratory, vaccination, OST centre, ART centre, ambu lance, blood bank leh damdawi dawr.
• Veterinary hospital, dispensary, clinic, sahuan, sangha khawi, hri danna pek.
• Agriculture, horticulture, sericul ture, animal husbandry leh fisheries hna leh a kaihhnawih thlaichi, leiṭha, ranchaw leh hmanraw dawr.
• Bank, insurance, ATM, postal service, blood donation camp/service.
• Kohhran pisaa thawktu pawi mawh zual kohhran office hotu berin lehkha a siamsakte.
• Power & electricity, water supply (mimal tui chawite huam in), sanitation & solid waste ma nage ment (hmunphiat leh bawlhhlawh paihte huamin), tele communication, inter net service, broadcasting, cable service.
• Petrol/diesel filling station, LPG
• Fair price shop
• Nau pai, nausen pawm leh nau pangte hnena nutrition (chaw ṭha) sem
• Bawnghnute lak khawm leh sem
• MGNREGS, MPLAD leh MLALAD hnuaia hnathawh
• Print media, electronic media leh chanchinbu sem.
• Bungraw hlân leh hlânthlak