KHAWTHLIR

Mumbai-a Mizo hmeichhe pakhat Covid-19 kai pasal chu nimin khan a thisen endik result a chhuak a, Covid-19 a kai lo tih hmuh a ni.

Lunglei College NSS unit chuan AVBD leh Blood Bank-te ngenna chhángin nimin khan Lunglei Civil Hospital Blood Bank-ah thisen unit 15 an pe. 

Minister of state K Lalrinliana chuan nimin khan a bial chhung Bairabi khuaa thlipui leh ruahsurin a tihchhiat in 10 leh Church of God Israel Kohhran biak-in hulhliap chung a len chhiatte a hmunah kalin a tlawh a, ṭanpuina Rs. 5,000 leh silpauline pakhat ṭheuh a pe. Sorkar aṭanga ṭanpuina awm thei angte pek thuai an nih tur thu a sawi bawk.

Horticultural Development Board vice chairman Prof. F Lalnunmawia, MLA chuan coronavirus hri léng meka Vegetable Supply Chain kalpui zel a nih theih nan, nimin khan Sihphir tlangdunga kut hnathawktute thlai thar dahṭhatna tur leh Sih phira cold storage changtlung tak siam dan tur a hmunah a enfiah. MLA hian Sihphir tlangdung chu Aizawl khawpui thlaia châwmtu a nih thu leh cold storage awm ngei thei tura hmalak a nih thu a sawi a; Sihphir task force ṭanpui nan Rs. 4,000 a pe a ni. 

Melbuk khua chuan CM Relief Fund aṭanga ṭanpuina Rs.10,000 an dawn chu CM Relief Fund-ah Covid-19 do nan a ṭula hman turin an pe lêt. Ṭanpuina sum hi Champhai SDO (Sadar) Lalnunfela Chawngthu hnenah an hlân a, nimin vêk khan CM Relief Fund account-ah thun nghal a ni. 

Union Agriculture minister Narendra Singh Tomar hoin nimin khan video conferencing hmangin kum 2020 atana 'National Conference on Kharif Crops' neih a ni a, Mizoram sorkara Agriculture secretary Lalhmingthanga leh hotu dangte an tel. Conference-a an sawiho thil eng emaw zat zingah Covid-19 vanga thlai thar hralh dan tur leh loneitute'n bahlah loa hna an thawh theih dan turte a tel a ni.

Govt. Mamit College chuan an Adopted Village, Vawngawnzo khua a mi harsa zawkte ṭanpuinan an pawisa thawhkhawm aṭangin Buhfai, Dal leh Chi bag engemawzat VLTF kut ah an hlan.