YMA Rorel Inkhawm vawi 1-na Mizote inpumkhat nana hmalak an rêl

YMA Rorel Inkhawm hmasa ber chu nimin khan R Dengṭhuama Indoor Stadium, Mualpuiah neih a ni. Zo hnah-thlakte tun aia inpumkhat lehzual theih nana hmalak an rêl a; kum 2017 kumpuan atan 'Ram leh hnam humhalh' tih an thlan bakah, kum 2017-a YMA General Conference neihna atan Champhai Zotlang an thlang.

YMA General Conference chu kum tin neih a ni tawh dawn lo a, General Conference neih loh kumah Rorel Inkhawm neih ṭhin tura tih niin, kumin hi rorel inkhawm neih hmasak ber a ni.

Inkhawm hi Central YMA president Lalbiakzuala'n a kaihruai a; YMA branch, group leh sub-headquarters tina office bearer ṭheuhte rorel palai an ni a, palai 1,404 an kal.

YMA Rorel Inkhawm chawhma lamah CEC member Vanlalzuiliana kaihhruaiin member thite sûnna hun hman a ni a, CEC member C Lalnun-tluanga kaihhruaiin YMA Thu-thlung sawi rual a ni. General secretary Lalhmachhuana'n an-nual report 2015-16 a pe a, finance secretary Lalrochuanga Pachuau-in finance report a pe.

Chawhnuah rorel inkhawm neih a ni a, CYMA treasurer J Lalsailova'n kum 2017 budget a pharh a; budget atan Rs. 1,00,90,000 an pawm.

Ramngaw leh nungcha humhalh ṭha, tuihna humhalh ṭha, kumpuan bawhzui ṭha, YMA Chanchinbu la ṭha leh Branch YMA chanchinbu
ṭhate hnenah lawmman hlan a ni bawk (lawmman dawngtute hi phek 2-ah dah a ni).

Zanah CYMA vice president Vanlalruata kaihhruaiin inkhawm a ni a, CYMA presi-dent Lalbiakzuala'n thu a sawi bakah, general secretary Lal-hmachhuana'n kumpuan thupui a sawi.

Hnam lâmte entir a ni a, zaipawl leh mimal eng emaw zat an zai a; Mount Everest chhipa láwn chhuak Lalrintluangi, Dawrpui Vengthar leh Rio Olympic-a India hmeichhe hockey team-a tel H Lalruatfeli, Lungleng, Lunglei district hnenah chawimawina hlan a ni.

YMA-ah hian tun dinhmunah branch 807, group 47 leh sub-headquarters panga a awm a; member 4,04,722 awmin, mipa 2,47,467 leh hmeichhia 1,57,255 an ni.

Mizoram páwnah Assam, Meghalaya, Manipur, Nagaland leh Tripura-ahte YMA branch leh group a awm a; Bangladesh-a Sajek-ah branch a awm bawk.

YMA Rorel Inkhawm thurelte

A. YMA khawih

1. Central Service-ah Mizote tam zawk an luh theih nan CYMA-in hma la rawh se.

2. Mizoram hmun hrang hranga kan pípúte hmun hlui leh sûlhnute hi a nih phung hloh loa humhalh a nih theih nan CYMA-in hma la rawh se.

3. Mizoramin Trading Regulation Act
ṭha leh mumal zawk a neih theih nan CYMA-in hma la rawh se.

4. Zo hnahthlakte tun aia kan impumkhat lehzual theih nan CYMA-in hma la rawh se.

B. Sorkar khawih

1. Mizo hnam ziarâng/hnam lâmte hi member náwlpuite'n kan thiam theih nan zirna in hrang hrangah sorkarin zirtir dan ngaihtuah rawh se.

2. Lui dunga nungchate humhalhna dan a awm theih nan CYMA-in sorkarah thlenin hma la rawh se.

3. State Referral Hospital, Falkawn bul hnaiah damlo enkawltute tan khualbûk sak a nih theih nan YMA-in hma la rawh se.

4. ILP chungchangah sorkarin mumal zawkin kalphung thar a siam theih nan hmalak ni rawh se.