Postal deptt-in Philately Exibition buatsaih

Indian Postal department, Mizoram Division chuan nimin khan Tuikhuahtlang YMA Hall-ah Philately Exibition an buatsaih a, Tuikhuahtlang Local Council chairman Biak-tluanga'n a hawng.

Exhibition-ah hian postage stamp lak khawm lama tui mi 14-in ram hrang hrang postage stamp-te an pho chhuak a; stamp chi hrang hrang pho chhuah zingah, lehkhathawn pangngaia hman ṭhin te, sorkar lehkha pawimawh thliar hran nana hman chi te, sorkar lehkha chauha hman chi te, chhiah pêknaa hman chite a tel.

Exibition buatsaihtute chuan, ram changkang zelah lehkha inthawnte miin an uar tawh lo a, chu chuan postage stamp hlutna a tizual telh telh niin an sawi a; philatelic stamp chuan ram hrang hrang khawsak dan te, hmasawn dan te, indona hmanrua an neih dante an ram thil thar chhuahte ṭhangtharte hnenah a hriattir thei tih an sawi.

Postal department, Mizoram Division hotute chuan, Mizoram Remna Ni hriatrengna turin Mizo pa siam ngei postage stamp tihchhuah a ni tawh tih an sawi a, "He stamp hi tih-chhuah nawn a nih tawh dawn loh avangin a hlutna a sang telh telh dawn a ni," an ti.

Nimina Exhibition-ah hian stamp la khawm tam leh lak khawm lama tiṭhate hnenah lawmman hlan a ni.