AR-in 'Run for Fun' an huaihawt

Assam Rifles chuan Peace Expedition an kalpui mek pualin nimin zing khan Aizawlah ‘Run for Fun’ a huaihawt a, Governor Lt.Gen. Nirbhay Sharma-in a vailiam.

Governor chuan, Assam Rifles-in hmarchhak state pathum - Mizoram, Tripura leh Assam fang tura Expedition for Peace an buatsaih chu ṭha a tih thu a sawi a, "Expedition hi sipaite'n ke, motor, lawng leh thirsakawr hmanga state pathum an tlawh chhuahna tur a ni a, an ngaihsanawm hle a ni," a ti.

Larsap chuan, AR-te chu an Expedition thupui angin, remna leh muanna thupui a ken bakah, an thlen chinah hriselna leh faina, ruihlo do, zirna leh eizawnna kawngah mipuite zirtir zel turin a chah.

He hun huaihawttu 39 Assam Rifles commandant Col. AN Mukhopadhyay chuan, Mizoram mipuite nena an inlaichinna ṭha siam zel turin Assam Rifles chuan theihtawp a chhuah reng tih a sawi.

Nimin zinga Run for Fun hi India ram pumin hriselna lama hma a sawn theih nana hma a lak mek thlun zawm nana buatsaih a ni. Governor bakah, AR inspector general (East) Maj.Gen. Chandran leh AR officer dangte an tel a; MFA, YMA, CRPF, BSF, NCC, zirna in aṭangin mi
ṭhahnem tak an tel bawk.

AR Expedition for Peace hi October 13, 2016 khan Parva, Lawngtlai district aṭangin an ṭan a, Lunglei, Serchhip, Champhai leh Aizawlte an tlawh tawh. Aizawl aṭangin Mamit district lamah an kal ang a, Damparengpui kaltlangin Tripura a lut ang.