KHAWTHLIR

Thisen pe

WhatsApp-a Lawngtlai Future Group member-te chuan nimin khan JH Lorrain Hall, Lawng­tlaiah blood donation camp an huaihawt a, Lawngtlai District Hospital tan mipa 15 leh hmeichhia pahnihte'n thisen unit 17 an pe.

Damdawi-in tlawh

Health secretary Lalrinliana Fanai chuan, nimin khan Lunglei Civil Hospital a tlawh a, chief medical officer, medical superintendent leh thawktu dangte nen inkâwmin, damdawi-in dinhmun an sawiho. Health Secretary hian damdawi-in pindan hrang hrang a fan bakah, nursing school a tlawh.

PHE workshop

PHE Chief Engineer Zone-II chuan nimin khan Lungleia IPR Conference Hall-ah ni hnih awh tur, ‘Workshop on Sustainable Development Goals’ an buatsaih a, PHE chief engineer C Lalremsiama'n a hmanpui. Workshop hi Lung­lei WATSAN Circle hnuaia junior engineer leh a chung lamte tana buatsaih a ni a, Division hrang hrangin an din­hmunte an sawifiah a ni.

Ruihhlo man

Excise & Narcotics department-a Anti-Narcotics Squad chuan nimin khan New Champhai-ah Pseudo-Ephedrine mûm 3,40,000 leh a neitua puh Malsawmsanga (38) s/o Liansawta, Champhai Bethel Veng an man. Malsawmsanga hi NDPS Act, 1985 tlawhchhanin thubuai siamsak a ni.

UT bawhzui

Mara Democratic Front (MDF) president M Laiko chuan, nimin khan Siaha-a an party pisaah thuthar thehdarhtute a kâwm a, tun hnaia New Delhi-a kal ṭumin sorkar laipui hotute hnenah Mara ram tana union territory an dil a bawhzui niin a sawi. M Laiko hi tun hnai khan an party dintu PP Thawla nen New Delhi-ah Union Tribal Affairs minister Jual Oram leh minister of state for Home Kiren Rijiju te an hmu a ni.