Remna leh muanna hman tangkai a tul - CM Lal Thanhawla

Chief minister Lal Thanhawla chuan, Mizoramin remna leh muana, man to taka a lei chu ram leh hnam tan engtin nge ṭangkai taka kan hman ang tih leh, ei leh bar, sum leh paia Mizorama intodelhna tur kawng ngaihtuah tlan chu thil pawimawh ber a nih thu a sawi.

CM Lal Thanhawla hian nimina Peace Accord MNF Returnees Association (PAMRA) General Assembly vawi sarihna, Chanmari YMA Hall-a neih a hmanpuinaah thu sawiin, "Rambuai chanchin leh history dik tak hi hriat a ṭha a, ṭhangthar tam takin an hriat fumfe loh avangin sawi a ngai ṭhin," a ti.

Chief Minister chuan, PAMRA member-te chu ram maichâma a taka nunna thàpa zalenna sualtu, hnam sipai dik tak an nia sawiin, "Mi tam takin chhungkua, u leh naute an chán a, rethei bakberh deuhte'n an awm a, tam tak martar an awm bawk. Remna leh muanna hi Pathian lam ṭang programme a ni a, Pathian duh zawng a ni," a ti a; Pa hun tiamah Peace Accord a awm thei tih a sawi.

Kum 20 chhung ṭah leh ha ṭhialnain Mizoram a tlakbuak tih sawiin, Lal Thanhawla chuan, "Tuboh leh dolung inkara kan awm avangin kawng hrang hrangin kan rahbi a tleu a ni," a ti a; rahbi tleuna aṭanga dinhmun siamna turin NLUP an ngaihtuah chhuak tih sawiin, "Hmuhsitna leh sawichhiatna karah NLUP a hawlhtling zel a, tunah chuan UNO pawhin ṭha tiin Aizawlah pisa hial an hawng tawh a ni," a ti.

Chief Minister chuan, Inremna Thutlung ennawnna turah din, ‘Review Committee on Memoramdum of Settlement (Peace Accord) 1986' chu tuaithar tura hmalak mek a ni tih sawiin, an tih tur (Terms of Reference) pawh mithiamte'n an ngaihtuah mek niin a sawi a; PAMRA, MURA leh Martar Family-te chu Chief Minister’s Rural Housing Scheme hmanga khuh vek tum a nih thu a sawi bawk.

Inkhawma khualzahawm, minister PC Lalthanliana pawhin thu sawiin, martarte thlanmual chu a ropuina aiin, martar chhung-te mittui a hru hul em tih leh martarte hlutna a tidal em, tih ngaituah chian ṭhaa a hriat thu a sawi.