Zorama'n Modi-a hnenah The Mizoram Maintenance of Household Register Bill puitlin thuai tura hmalakpui turin a ngen
Chief minister Zoramthanga chuan January 23, Ningani tlai khan prime minister Narendra Modi chu New Delhi-a a chennaah a kâwm a; Mizoram mamawh thil hrang hrang a sawipui a, March 18, 2019-a Mizoram Legislative Assembly-in a pass tawh The Mizoram Maintenance of Household Register Bill chu a rang lama dan puitlinga siama hman a nih theih nan hma lâkpui turin a ngen.
CM Zoramthanga chuan, Mizoram Legislative Assembly-in The Mizoram Maintenance of Household Register Bill pass tawh mah se, Governor-in a la pawmpui loh avangin dan a la tling lo a, hman theih a la nih loh thu a sawi a; Governor-in pawmpuina (assent) a pek theih nan hma lakpui turin Prime Minister a ngen a ni.
Zoramthanga chuan, The Mizoram Maintenance of Household Register Bill chu Mizoram mi dik takte hriat theihna tur dan a nih thu sawiin, "Bill hi state chhunga chhungkaw tin chhinchhiahna tur pakhat a ni a, dan kalha thil tih hrang hrang - ralthuam leh ruihhlo hralh rûk te, mihringa sumdawnna te, thil tawlh rûk te, ramri kân rûk leh a dangte dona atana ṭangkai tak tur a ni," a ti a; hmalakna dang awmte nen a inkalh loh thu a sawi bawk.
Chief Minister chuan, Mizoram tan all India service cadre hran siam a nih theih nan hma lakpui turin PM Modi a ngen a; AGMUT cadre-a officer-te chu state hrang hrangah kum rei lo tê tê chauh an awm ṭhin tih sawiin, "An service-na state-ah an awm tlángnél tak tak hman lo ṭhin. Hei vang hian mipui nunphung chiang takin an hre hman lo a, khawtlang mamawh pawh an hre chiang hman lo fo ṭhin. Chuvangin, Mizoramin cadre hranpa a neih a pawimawh," a ti.
Ministry of DoNER leh North Eastern Council (NEC) hmalak dan felfai taka thliar a ṭul tih sawiin Zoramthanga chuan, "Hmarchhak state mipuite'n DoNER leh NEC aṭanga hmasawnna hna puihna kan hmuh ṭhin hi ṭangkai thei ang bera hman a nih theih nana hmalak a ṭul," a ti a; Non Lapsable Central Pool of Resources (NLCPR)-a hmarchhak state tana hmasawnna hna thawhna tur sum dah, hman loha la awmte chu pek chhuah thuai a nih theih nan hma lakpui turin a ngen.
CM Zoramthanga chuan, external aided project (EAP) chu sorkar tan sum hmuhna hnár ṭha tak a nih laiin, special category state-te tan hmuh a harsat tawh avangin, sum inpek dan kalphung (funding pattern) thlâk a nih theih nan hma la turin PM a ngen a; 15th Finance Commission kaihhnawih thil pawimawh hrang hrangte leh AIIMS ang chi medical college leh damdawi-in Mizoramin a mamawh thu a sawi bawk.PM Narendra Modi chuan CM Zoramthanga thu thlente chu theihtawp chhuaha a bawhzui tur thu a hrilh a; India hmarchhak pumah remna leh muanna a awm theih sorkar laipuiin a duh thu sawiin, India leh Myanmar nen inlaichìnna ṭha leh rálmuang tak ramin a neih chhunzawm zel a duh thu a sawi. Prime Minister hmuhnaah hian Chief Minister hi Mizoram House resident commissioner Ajay Choudhary leh OSD (Home) David Lalthangliana leh Mizoram sorkara official dangte'n an
ṭawiawm a ni.