Thla ruk chhungin Siaha district-ah Nausen kum khat hnuai lam 23 an thi

21st October, 2016

Nimin khan Siaha DC pisa conference room-ah District Development Coordination & Monitoring Committee (DISHA) an ṭhu a; April-September, 2016 chhungin Siaha district-ah nausen kum khat hnuai lam 23 leh nau chungah nu pahnih an thi a, infant mortality rate (IMR) chu 49 a ni tih tarlan a ni.

Siaha district DISHA meeting hi chairman CL Ruala Lok Sabha MP leh Ronald Sapa Tlau, Rajya Sabha MP-te hoin neih a ni a; Siaha district-a sorkar laipui hnuaia centrally sponsored scheme (CSS) hmanga hna thawh hrang hrangte an thlirho.

CL Ruala chuan, CSS sum hmangin a khawihtu department-te'n chhenfakawm hmasawnna leh ram ro tling an siam em tih sorkar officer-te'n an inzawh fo a ngaih thu a sawi a, "Siaha district mipui pawhin hmalakna kawng tinrengah
ṭawiawm a, finchhuah a, CSS sum hi a lo thlâwn-a a luan ral mai loh nan rinawm tak leh taima taka kan thawhho a ngai," a ti.

Ronald Sapa Tlau pawhin,CSS hnuaiah line department-te thawhho a ṭul fo tih sawiin, sorkar department hrang hrangah head of office-te chu inlung-rual taka mipui hamṭhatna leh ram hmasawnna turte rilrua dah pawimawh ber chunga thawk turin a chah.

Meeting-a tarlan danin, sorkar kum kal meka April-September chhung khan Siaha district-ah nu nau chunga thi mi pahnih an awm a; nausên kum khat hnuai lam 23 leh naupang kum 1-5 inkar pakhart an thi. IMR chu 49 (nausen 1,000 zelah 49 an thi tihna) a ni. Naupang damlo Sick New-born Care Unit (SNCU)-a admit 88 zinga 80 (99%) an dam chhuak a, pariat (1%) an thi thung. Siaha district-ah health worker hmeichhia awm lohna Health sub-centre pakua a awm.

April-September thla chhung vekin MGNREGS hnuaiah cheng nuai Rs. 183.884 an hmu a, district-a job card nei mi 13,757-te tan ni ruk chhung inhlawhna pek chhuah a ni tawh. Sum la hman loh zat chu Rs. 1,38,400 a ni. IWMP hnuaiah cheng nuai 144.59 hmuh a ni tawh a, nuai 78 pek chhuah tawh niin, la hman loh nuai 66.59 a la awm.

PMGSY hnuaiah kawng-pui pariat, a thui zawng belhkhawm km. 132.79 sial mek a ni a; PHE department kaltlangin Tong-kolong WSS (solar pump-ing) zawh a ni tawh a, Siaha GWSS erawh zawh hun tur bituk kum 2015-1 chhungin zawh a ni lo.