AMC-in police-te solar light an pe Ramri hmun 135-ah police an duty

Aizawl Municipal Corporation (AMC) mayor PC Lalhmingthanga chuan nimin khan ramria Mizoram police duty-te hman turin AMC aṭanga pek solar home light 90 chu Mizoram inspector general of police (IGP) John Neihlaia hnenah a hlân.

IGP chuan, ramri hmun 135-ah police an duty mek thu a sawi. PC Lalhmingthanga chuan, an thilpek chu thil hlu ber leh tha ber ni lo mah se, ṭangkai taka an hman tur a nih AMC-in an beisei thu a sawi a, "AMC-in Covid-19 do nan theihtawp chhuahin hma a la a, ram ropui ber America pawhin do harsa an tih hi keini ram tan chuan tih theih a tlem hle a ni," a ti a; ṭawngṭaia Pathian auh zel a pawimawh thu a sawi a ni. IGP John Neihlaia chuan, an mamawh em em AMC aṭanga an dawng chu lawmawm a tih thu leh ṭangkai taka an hman ngei a beisei thu a sawi a; Covid-19 leh a kaihhnawih sawiin, "Mizoram police-te ramri hmun hrang hrang 135-ah an duty mek. Covid-19 kaihhnawihah thu dik lo leh dan phal loh thilte social media-ah thehdarh a ni ṭhin hi a pawi a, hetiang avang hian case eng emaw zat siam niin, mi 25 man a ni tawh,'' a ti. Aizawl Mayor hian AMC councillor-te hnenah an ward ṭheuha local task force tina sem tur Rs. 10,000 ṭheuh a hlân bawk.