ZPM-in inkhârkhip pawhsei a thláwp

ZPM president Lalliansawta chuan, "Hmun tina ramri venga thawk chhuak task forcete an chhuanawm a, a thlamuanthlak a, sorkar force hrang hrangte nen phawkhai rual taka an thawhho phawt chuan hripui lakah Mizoram kan him a beiseiawm," a ti. ZPM President hian nimin khan thuchah tichhuakin, "Ni tin ei chawp dap, fairel bél ruak an tam tawh dan ngaihtuah chuan inkharkhip a chi tawh lo. Mahse, Covid-19 hri léngin kil tin aṭanga min hual dan ngaihtuah chuan invenhim dan ṭha ber inkharkhip chhunzawm hi tihmâkmawhah ZPM chuan a ngai," a ti a; Mizoram sorkarin April 30 thleng inkharkhip hun a pawtsei chu an thlàwp thu a sawi.

Covid-19 vanga Dr John L Sailo a thi chu pawi an ti a, an sún tak zet tih sawiin Lalliansawta chuan, "A kalsan a chhungte boruak rit chi hrang hrangin a tlakbuak hi pawi kan ti. State chhung leh páwna Covid-19 hri vei enkawl mekte ṭha taka dam thuai turin duhsakna kan hlan a ni," a ti. Lalliansawta chuan, hripui do hna chu ni tam thawh a ngai tawh lo tura rin a nih thu sawiin, "A hun laia do hneh loh chuan chhiatna rapthlak zawk thlen thei a nih avangin, inkharkhip vanga harsatna tawh belh tur awm apiang chhel tak leh huai taka hmachhawn turin kan ngen a, mi inphalte zarah rilṭám mualpho kan awm lo ang tih kan beisei," a ti a, ṭha hnemngai taka Pathian au turin mipui a sáwm a ni.