CM-in mau sawngbawlna a hawng; 'Sorkar enkawl factory leh plant-te a dam chhuak ṭha ṭhin lo hle' - CM

Chief minister Lalduhoma chuan nimin khan Sairanga Horticulture Centre-ah National Bamboo Missions (NBM) sum nuai 252.826 hmanga din mau sawngbawlna hmun, Bamboo Treatment & Seasoning Plant, Bamboo Depot & Godown leh Activated Charcoal Unit (meihawl siamna) te a hawng. CM chuan, sorkar enkawl factory leh plant-te a dam chhuah ṭhat loh ṭhin thu a sawi.

CM Lalduhoma chuan, a thil hawn tâkte chu department lamin an enkawl phawt dawn thu sawiin, "Sorkar enkawl factory leh plant-te hi a dam chhuak ṭha lo ṭhin hle mai. Ṭha takin lo enkawl u la, ṭangkai takin hna lo thawk ngei se kan duh a ni," a ti a; ṭha taka enkawl ngei turin thawktute a chah.

NBM hmalakna hmanga mau sawngbawlna thar din a ni ta chu lawmawm a tih thu sawiin Lalduhoma chuan, "Mau hi kan ramin resource kan neih ṭhat a ni a, a chhawr pawh kan chhawr ṭangkai. Tunlai mila kan hman thiam zel hian kan economy tiṭhatu, eizawnna tam tak min siamsaktu a ni thei a ni," a ti.

Chief Minister chuan, mau sawngbawlna chu mau hmanga thil siam ṭhinte tan a hlut tur thu sawiin, "Meihawl kan siamna hnâr ber hi thing a ni ṭhin. Thing rawn puitlin hun chhung a rei a, mau erawh chu kum hnih khat lekah a rawn lian leh mai a, a zung nena kan kar loh phei chuan a thi hlei thei lo," a ti a, meihawl siamna atana mau kan hman a nih chuan ramngaw chereu chak lutuk tur a ziaawm dawn thu a sawi.

Horticulture minister C Lalsawivunga pawhin thu sawiin, mau sawngbawlnaah Mizoramin hmasawnna thar an nei chu a phûr thu a sawi a, "Kan ramah mau a tam a, kan ram tualṭo ni lo, a chi dang pawh tun hma aṭangin kan chin belh a, kan mau neihte hi ṭangkai taka hman tumin kan bei zel dawn a ni," a ti.

Horticulture director CH Lalmuanpuia sawi danin, Bamboo Treatment & Seasoning Plant hi ngêt thei tawh lo tura mau sawngbawlna a ni a, sawngbawl tawh chu kum 50 thleng hman theih a ni.

Meihawl siamna Activated Charcoal Unit aṭangin ni khatah meihawl ton 3 (quintal 30/kg 3,000) siam theih a ni a, kum khatah ton 900 siam chhuak thei tura beisei a ni. Ni tin mau pum 670 vel a mamawh a, meihawl a siam rualin ni tin vinegar litre 100 vel a siam chhuak nghal zel dawn. Hman tlaka thlawr fîm (distilled) hnuah ni tin vinegar fîr ṭha litre 54 vel a chhuak thei dawn a ni.

Mau sawngbawlna dinna tur hian North East Cane & Bamboo Development Council (NECBDC)-in technical support an pe a, khawl enkawl dan leh hman dan pawh an zirtir dawn a ni.