Zuangtuiin thupha an chawi; Politics-a indemna atan an duh lo

Zuangtui Local Council leh All NGO chuan an venga PWD hmuna May 7, 2025 zana bitumen hot mix plant tihchhiat chungchangah thuphâ an chawi a; thil thleng chu politics-a indemna atan hman an duh lo tih an tarlang.

May 13, Thawhlehnia Zuangtui LC leh NGO-te ṭhukhawm chuan, "May 7 zana PWD hmuna bitumen hot mix plant mipui pungkhawmin an tichhia hi a pawi kan ti takzet. Hot mix plant khu tuartute harsatna kan lo hrethiam phak tawk lo hle niin kan hria a, tharum thawhna duhawm lo tak a chhuah phah hi pawi kan ti tak zet," an ti.

Zuangtui LC leh NGO-te chuan, hot mix plant tihchhiat vanga sorkar kawng siam lai a khaihlak chu pawi an tih thu sawiin, "Sorkar, veng chhung kawng siam lai neitu leh Mizoram mipui chungah thuphâ kan chawi," an ti a; thil thleng chu politics thila indem nan leh hamṭhat lak tuma political issue-a hmang lo turin mi tin an ngen a ni.