Sorkarin mipui hriselna a ngai pawimawh - Health Minister

Regional Institute of Paramedical and Nursing Sciences (RIPANS)-a M.Sc. (Nursing) final year zirlaite chuan nimin khan RIPANS-ah ‘Investing in Nurses, Investing in Health: Empowering the Future of Healthcare’ tih thupui zirhona an buatsaih a; khuallian Health minister Lalrinpuii chuan, sorkarin mipui hriselna a ngaih pawimawh thu a sawi.

Health Minister chuan, "Sorkarin mipuite hriselna ngai pawimawhin Mizoram Universal Healthcare Scheme mi tin huapzo turin a kalpui ṭan mek," a ti a; nurse-te chu mipui tana rawngbawl an nihna vawng nung zel tur leh mipui hriselna tura dinhmun pawimawh tak chelhtu an ni tih hre reng turin a chah.

Training hawnna inkhawm hi RIPANS director Prof. Dr Sanjay D Sawanta-a'n a kaihruai a; nursing zirna-in leh damdawi-in hrang hrang aṭangin nursing zirtirtu leh nursing officer 30 an tel. Mithiamte'n thupui hrang hrang an zirtirna a ni.

RIPANS hi sorkar laipuia Ministry of Health & family Welfare hnuaiah kum 1996 khan din a ni a, hmarchhak state hrang hrang aṭangin zirlai 800 chuang an awm mek. Bachelor course panga, master degree course pathum leh Ph.D. zirna programme pakhat a awm a ni.