India-Myanmar ramri hung turah entry/exit point 13 ruahman a ni

Saitual Border Coordination Committee chu nimin khan Saitual DC conference room-ah an chairman Dr Lalngura Tlau, bawhrhsap hoin an ṭhukhawm a, ramri chungchang an sawiho. India leh Myanmar ramri hung turah entry/exit point 13 ruahman a nih thu tarlan a ni.

Ṭhutkhawmah hian Indo-Myanmar ramria luh leh chhuahna hmun bik (entry/exit point) siamna turin hmun 13 thlan chhuah a ni a, chumi zingah chuan Saitual district chhunga Hrianghmun-Tuisa lui a tel.

Entry/exit point tura thlan Hrianghmun-Tuisa lui chu Border Coordination Sub-Committee Chairman, SDO(C), Assam Rifles aiawh leh BRO aiawhte'n chu a huhoin an enfiah dawn a; ramri hungna tur hmun te, entry/ exit point siamna tur te, check post siamna turte an en ang.

Joint survey report chu Border Coordination Committee-ah thehluh a ni ang a, Committee-in Home department-ah an thehlut leh dawn a ni.

Dr Lalngura Tlau chuan, Home department aṭanga ngenna an hmuh angin Indo-Myanmar border-a luh leh chhuahna (entry/exit), hungna (fencing) leh hnathawh ngai hrang hrang endik a, a tul anga hma la turin Border Coordination Committee din a nih thu a sawi.

Ngopa SDO(Civil) kaihhruaina hnuaiah Border Coordination Sub-Committee din a nih thu sawiin Bawrhsap chuan, "Assam Rifles leh Border Roads Organisation (BRO) te nen ṭanghoin hma an la dawn," a ti a; ramri hung leh ramri kâna luh leh chhuah chungchangte mipui hnena puanzar leh hriattir kawngah theihtawp chhuah turin kalkhawmte chu a chah.