Serchhip Industrial Estate din tum sawiho

Commerce & Industries director Maria CT Zuali hoin nimin khan Serchhip DC meeting hall-ah Serchhip Darnam tlanga Serchhip Industrial Estate din tum chungchang sawiho a ni a; Director chuan, Serchhip tan Rs 14,99,00,000 hû flatted factory project siam mek a nih thu a sawi.

Maria CT Zuali chuan, Serchhip district-a industrial estate chawikanna tur project thehluh a ni dawn tih sawiin, "Revenue department nen kan enho hnuah DIC Complex, Darnam tlang chu industrial area-ah puan a, a hmun a zîm avangin plug & play facility (flatted factory) dah ni se, tiin kan rel," a ti.

Flatted factory chu in pakhata factory/unit tam tak awm theihna tur a nih thu sawiin Maria CT Zuali chuan, "Serchhip district hian flatted factory a neih ve ngei theih nan hmalak mek a ni a, Rs 14,99,00,000 hû project siam mek a ni," a ti. Darnam veng mipuite'n office sawn an phal loh vanga harsatna awm chungchangah, office chhuhsakna tur ni loin, a aia changtlung zawk an neihna tur a nih thu a sawi.

Tarlan danin, Serchhipa flatted factory complex hi ram square metre 2,000 bial chhunga din tum a ni a, thil siamna hmun tur a nih angin kawtkai zau tâwk tak awm tura duan niin, mi 72-in eizawnna an neih phah thei tura beisei a ni.

Ṭhutkhawmah hian Serchhip bawrhsap Paul L Khuma, Serchhip Sub Headquaters YMA leh Joint VC hruaitu te, Darnam VC-te leh sorkar official-te an tel.

Darnam khawtlang hruaitute chuan an huam chhunga industrial estate din chu a thuphungin an pawm a, Darnam venga cheng mipuite'n a nihphung tur an hriatthiam theih nan Serchhipa Commerce & Industries officer Lalchhanhimi chu vawiin zing lama mipui hrilhfiahna hun hmang tura tih a ni.