Sawhthing qtl 1,13,627 lei a ni tawh; Hralh lehnaah cheng nuai 634 hmuh a ni

Sorkarin thlai lei tura a thlan - sawhthing, hmarcha, hmunphiah leh aieng lei nan Mizoram sorkarin Mizoram Agriculture Marketing Board (MAMB) hnenah cheng vbc. 62.599 a pe tawh a; sawhthing quintal 1,13,627 lei tawh niin, lei sa hralh lehna aṭangin MAMB-in cheng nuai 634 hmuh a ni tawh.

Chief minister Lalduhoma hoa May 13, Thawhlehnia CMO Cabinet Room-ah sorkar hotute an ṭhutkhawma tarlan danin, notified crop pali - sawhthing, hmarcha, hmunphiah leh aieng leina atan Mizoram sorkarin MAMB-ah cheng vbc. 62.599 a dah tawh a, MAMB hian District Agriculture Marketing Committee (DAMC)-ah Rs 58,08,00,100 a pe tawh. MAMB hian sorkarah cheng vbc. 20 an dil belh leh mek bawk.

Sawhthing quintal 1,13,627 lei a ni tawh a, a ṭhen chu sorkarin sawhthing thartute aṭangin direct-a lei niin, support price pek hmanga lei eng emaw zat a awm bawk. Sawhthing lei sa hralh lehna aṭangin MAMB-in Rs 6,34,63,875 a hmu lêt tawh a ni.

Meeting-ah hian Agriculture minister PC Vanlalruata, Commerce & Industries minister F Rodingliana, adviser to CM (Handholding) Dr KC Lalmalsawmzauva leh mi pawimawh dangte an tel a; sawhthing slice dry kalpuinaa MAMB-in tualchhung mi 13 a thawhpui mek dan te, chak zawka kal dan tur leh an inzar pharh dante sawiho a ni.

Mizorama sawhthing sawngbawlna din duh, India ram chhung leh ram pawn firm parukte chungchangah sawiho niin, firm-te mamawh hriatsak a, an inbun duhna hmunte hriat a, a ṭul anga chak taka hmalak ni se, an ti a, bawhzuitu tur bik committee an siam nghal. Tun hnaia Bangladesh-a sawhthing hralhna chungchang ngaihvena kal society pakhat report thlirho a ni bawk.