Tuichhe paihna mumal siam turin hriattir

Aizawl district bawrhsap Lalhriatpuia, Aizawl District Disaster Management Authority chairman ni bawk chuan hriattirna tichhuakin, Aizawla in neite'n vantlang kawrpui/tui luankawr pawhin tuichhe paihna mumal tak an siam ngei tur a ni tih a tarlang.

Aizawl DDMA Chairman chuan, Aizawl Municipal Corporation-in a pek in sak phalna (building permit) neite'n tui khawlna tur ṭha tak an siam nghal tur a nih thu a tarlang a, "Hei hi a remchang lo a nih pawhin tui luankawra luang lut turin ruahmanna siam tur a ni. Aizawl khawpuia in neite'n tuichhe paihna mumal tak siamin, tuichhe paihnate chuan public drain a pawh ngei ngei tur a ni," a ti.

Vantlang kawrpui hlata in neitute'n an tuichhe paihna chu kawrpuia inchhûng thei turin Local Disaster Management Committee nen hma an la tur a ni tih tarlangin DC chuan, "AMC Building Regulation Section 37-in a phalsak angin an ṭhenawmte ram paltlang pawha tui luanna kawng siam phalsak tur a ni," a ti a; tui luankawr uluk taka siamin, lei chhunga tui lut lo tura siam tur a nih thu a tarlang.

Aizawl Bawrhsap chuan, AMC huam chhunga in, office, khelmual, vantlang zun-in sa turte'n Site Development & Slope Modification hnuaiah AMC-ah phalna lak tur a nih thu te, hmunhma degree 45 aia awihah chuan Slope Stability Analysis report neih ngei tur a nih thute a tarlang bawk.

AIZAWL BAWRHSAP TARLAN DANGTE

* AMC aṭanga building permit neite'n AMC-a SDSM Board-in excavation plan phalna an pek ang chauhin lei an lai tur a ni.

* An geologist rawihin uluk takin a enpui ngei tur a ni a, lung hâl ngai a nih chuan Geology & Mining Directorate-a mithiamte ruaiin, an enpuina hnuaiah hna thawh tur.

* Leilung thâwl/nghet lo a nih chuan khawl lian leh nghawr na thei chi hman loh tur.

* Inṭhenawm hnaivai, tui luankawr inṭâwmte'n ruahtui dawng vek thei tui luankawr ṭha tak an siam tur a ni.

* Local disaster management committee tinte'n mahni venga lungremte a him leh him loh enfiah tur a ni a, lungrem him tâwk loa hriatte chu a rang lamin ADDMA Chairman-ah hriattir tur.

* Vawk leh ar vulh phalna neite'n an vawk/ar in chhuat phahah cement (RCC) hmangin dawhthleng (tray) an siam tur a ni a, ran thlite chu tui luankawrah an paih ngei tur a ni.

* Aizawl chhung leh daia quarry neite'n Directorate of Geology & Mining aṭangin mining/ quarring plan an nei ngei tur a ni. Plan angin hma an la tur a ni a, a tlem thei ang ber lung hâl tur a ni a, nghawr na lo thei ang tur leh a bulhnai leilung tiche tlem thei tur ang berin engineer enpuina hnuaiah scientific blasting hman tur a ni. Shotfirer license nei loin lung hâl phal a ni lo.

* Quarry-a lung hâl dawnin lung hâlna tur kua chu ft. 6-a thûk, mm. 8 aia thûk/zau a ni tur a ni lo.

* Vawi khatah hmun panga aia tam hâl loh tur a ni a, quarry neitute'n mamawh chin chauh lung an la tur a ni.