Home Minister-in ramri vengtute a tlawh

Home minister Lalchamliana chuan nimin khan Bairabi leh Kanhmun chhehvela state ramri kâna Mizorama luh tumte vengtu police leh screening point-a duty Health department offi cial-te a tlawh a, minister of state K Lalrinliana'n a ṭawiawm.

Lalchamliana chuan, Covid-19 vanga Mizoram mipuiin harsatna lian zawk an tawh loh chhan sawiin, "State dang aṭang lo lut tur vengin ramriah task force, police leh medical team-te'n theihtawp an chhuah vang a ni," a ti a; ramri hrûla awm khaw mipui inpekna leh thawhrimnaah lawmthu a sawi. Home Minister chuan, ramri hrûla duty-te mamawh zualpui ruahman dan turte sorkarin a ngaihtuahpui zel tur thu a sawi a; Bairabi screening point-a duty-te hman tur hand sanitizer, personal protective equipment, hmai tuamna leh kutkawr leh task force duty-te mamawh lamna tur pawisa a hlan a ni.

Minister-te hi Bairabi North YMA Library-ah khawtlang hruaitute nen an inkâwm a; khawtlang hruaitute sawi danin, Bairabi khaw chhunga lut tur bungruate chu darkar 72 khawih che loa dah phawt a ni a, Bairabi khaw chhung lut tam loa lirthei kal dan siam niin, task force-te'n ramri inkalpawh theihna hmun 20 chuangah duty post siamin ramri an véng a ni.

Bairabi khawtlang hruaitute chuan, ruihhlo zawnga ramri hrûla veivâkte khung hran an ṭul thu te, ramria police duty hmun tihchangtlun a ngaih thu te, ramri thlithlaina turin duty-te thuam ṭhat an ngaih thute Home Minister hnenah an thlen.

Lalchamliana hian Kanhmun khuaa Mizoram leh Assam inrina leh Mizoram leh Tripura inrina a border outpost leh task force duty-na hmunte a tlawhnaah ei tur leh invenna hmanruate a hlân a, khawtlang hruaitute nen an inkâwm bawk. Kanhmun leh a chhehvelah hian duty post 14 siam a ni a, ṭum khatah mi 140 vel an duty ṭhin a ni. Home Minister hian Zawlnuam a tlawh bawk a, ramri vengtu local task force duty-te hman tur thosi lên eng emaw zat a pe. Zawlnuam Bawrai outpost, Bungṭhuam, Kolalian, Saikhawthlir, Thinghlun, Zamuang, Zawlpui leh New Eden border outpost-a dutyte ei tur leh mamawh leina tur pawisa a pe bawk.