Yoga thil tum bulpui ber chu Hindu-a mi leh a ni- CM Hawla

Chief minister Lal Thanhawla chuan, Yoga chu excercise ṭha tak ni mah se, a tum bulpui ber chu Hindu-te'n an sakhuaa mi seng luh an tumna niin a sawi.

Chief Minister hian nimin khan Congress Bhavan-ah thu sawiin, "BJP thupui ber chu India ram hi Hindu rama siam a ni. Kristian leh Muslim-te hi an endawng a, hmun
ṭhenkhatah chuan harsatna an siam a ni. An hruaitu tam tak chu vote duh an nih avangin ngawi hrih mah se, indan theih loh chin an nei ang. Parliament House-a Kristian leh Muslim hnawk an tih thu au chhuahpui ngam pawh an awm tawh," a ti.

BJP-te'n Hindu-a mi an leh theihna atan hmanrua ṭha leh fing tak tak an nei tih sawiin CM Hawla chuan, "Yoga hi excercise ṭha tak ni mah se, a thil tum bulpui ber chu Hindu sakhuaa mi leh a ni. A excercise pawh a ṭha lutuk a, tih ve pawh a ṭha. Mahse, kan invéng thiam lo ang tih a hlauhawm," a ti a; Yoga laka invên fimkhur a ṭul thu a sawi.

Lal Thanhawla chuan, Mizoram Governor-a AR Kohli a awm laiin Hindu sakhua tan a che nasa hle tih sawiin, "A hun lai khan Hindu sakhuaa seng luhte pawh a nei. Hindu sakhuaa inlet, inchhira min rawn pan, MNF-te'n an puih dan a receipt min pete pawh an awm. Mahse, intihmualpho ṭha ka ti lo a, a ṭul chuan kan la phawrh ang. MNF-te khan Hindu-a mi siamna kawngah AR Kohli kha an pui nasa hle," a ti.

Kawng chhia chungchang sawiin Hawla chuan, "Kawng chhia hi kan hria, kuminah kum dang zawng aiin fûr a nat bakah a rei," a ti a; fûr laia kawng siam a nih chuan sorkarin mâwl tih a hlawh zawk tur thu a sawi.

Chief Minister chuan, Mizoramin a mamawh ang zelin a kaihhruai sorkar chuan programme an siam tih sawiin, "Mirethei lamah kan ṭang a ni. Sum leh paia intodelh a, hnam ropui nih kan tum. Tun term chhung hian kan intodelh hman lo mai thei a, mahse, kan sorkar leh dawn avangin term tharah kan mamawh hrang hrangte kan nei hman ang," a ti.

Mizoram chhim lama Mara Democratic Front (MDF)-te'n union territory dil an tum chu demin Lal Thanhawla chuan, "Mizoram a têt tawh nâk alaia Mizoram
ṭhen duhtu MDF-te hi MNF thawhpui an ni," a ti a; Mizoram zauh tuma theihtawp chhuah a nih laia tihzîm tumte chu a dem thu a sawi.