CYMA President hlui B Daniala a thi

Central YMA presi-dent a záwna ni rei ber, B Daniala (70) h/o Krosthangi, Ramhlun South chu nimin zing dar 7:30 khan Greenwood Hospital-ah stroke vangin a thi a, vawiin chhun dar 12-ah vui a ni ang.

B Daniala hian hun eng emaw chen chu thisen sang leh zunthlum vangin harsatna a nei tawh a, damdawi-inah pawh an lut fo tawh. October 18 zanah Greenwood Hospital ICU-ah dah luh niin, a tûk aṭangin a thâwk ṭanpui turin ventilator vuah a ni a; nimin zing khan a thi ta a ni.

July 3, 1946-a piang B Daniala hi Central YMA-ah kum 1983-1989 chhung leh 1989-1993 chhung president a ni a, CYMA president chanvo chelh rei ber a ni.

CYMA-ah vêk kum 1977-1983 chhung assistant secretary a ni a; Ramhlun branch YMA-ah president leh mawhphurhna dangte a chelh tawh bawk.

B Daniala hian Congress party-ah mawhphurhna sang tak a chelh tawh a; MLA inthlanah pawh Sateek bialah Congress party candidate a lo ni tawh.