Police martarte hriatrengna hun hmang

Nimin khan Mizoram hmun hrang hrangah police-te'n ram tana nunna hlantu police-te hriatrengna hun, Commemoration Day an hmang. Aizawlah chuan DGP Thianglima Pachuau hoin 1st Bn. MAP hmuna martar thlânah hman a ni.

Kumina Commemo-ration Day-ah hian September 1, 2015 leh August 31, 2016 inkara India ram police, an duty laia thi mi 473-te sûnna hun hman a ni a; hemi hun chhung hian Mizoramah chuan duty laia police thi an awm lo.

Police Commemoration Day hi October 21, 1959-a Ladakh police post China sipaite'n lak ṭuma police duty lai mi pakua an kah hlum hriatrengna atan kum tin hman ṭhin a ni.