Mizoramah zu card nei mi 70,336 an awm

The Mizoram Liquor (Prohibition and Control) Act, 2014 hnuaiah September 1, 2016 thleng khan Mizoram pumah zu lei phalna card nei mi 70,336 an awm. July 2016 thlengin MLPC Act bawhchhia mi 2,851 man an ni tawh.

YMA Rorel Inkhawm vawi khatna, October 20, 2016-a R Dengṭhuama Indoor Stadium, Mualpuia neiha zan inkhawmah Central YMA general secretary Lalhmachhuana chuan YMA kumpuan thupui, 'Ram leh hnam humhalh' tih a sawi a; zu chungchanga Excise & Narcotics department record a sawi danin, Mizoram puma zu card nei mi 70,336 zinga 50,801 (72.23%) chu Aizawl district-a mi a ni a, 19,535 (27.77%) chu district dang zawnga mi a ni.

July 2016 thlengin Lawngtlai leh Siaha district tih loh district dang parukah MLPC Act bawhchhia mi 2,851 man tawh an ni a, chu'ng zinga 302 chu MLPC Act Section 43(2) tlawhchhanin vantlang hna thawk tura hrem an ni.

District hrang hranga social work ti tura hrem zat chu - Aizawl district-ah mi 160, Lunglei district-ah 49, Champhai district-ah paruk, Kolasib district-ah 21, Champhai district-ah 36, Mamit district-ah 30 an ni.

MLPC Act hman hnua zu kaihhnawiha thubuai ziah luh zat chu 3,075 a ni. Kum 2015 chhungin mi 2,139 man niin, thubuai 2,312 man an ni a; kum 2016 chhungin (July 1 thlengin) mi 712 man niin, thubuai 763 ziah luh a ni.

Hetih lai hian, Synod Social Front-in November 2015 leh January 2016 inkara zir chianna an neih (unpublished)-a an hmuh chhuah danin, kum 2014 khan zu vanga thi mi 284 awmin, kum 2015-ah 375 an awm a, 2014 aia 2015-a a tamna hi 94 (33.09%) a ni.

Synod Social Front hmuh chhuah dan chuan, kum 2014-ah zu vanga tualthahna pariat a thleng a, kum 2015-ah 27 a thleng. Zu kaihhnawiha nupa inṭhen kum 2014-ah 121 leh kum 2015-ah 295 an awm a; zu vanga rawngbawlna chawlhtir kum 2014-ah mi 52 leh kum 2015-ah mi 104 an awm bawk.

Zu card nei zat

(Sept. 1, 2016 thleng)

District/Khua Card zat

Aizawl 50,801

Lunglei 6,195

Siaha 1,322

Champhai 3,249

Kolasib 4,290

Serchhip 3,180

Mamit 929

Vairengte 370

Total 70,336