KHAWTHLIR

Lunglei DC thar

Mizoram sorkarin Lunglei district deputy commissioner atana a ruat thar, Lalzarmawii, IAS chuan nimin khan Lunglei bawrhsap hna a thawk ṭan.

Tlan khap

Traffic SP chuan thupek chhuahin, Ramhlun North, Tlaklui - Sihpui Road (Lalrina Sailo kawmthlang)-ah kawngpui a khîk avangin chim theia ngaih a nih thu a tarlang a, "Helai hmunah hian kawng siamṭhat a nih hma chuan lirthei lian 407 (truck) leh a chung lam chin kal phal a ni lo," a ti.

NLUP sem

Horticulture department chuan nimin khan Serchhip District Horticulture office-ah NLUP ṭanpuina an sem a, DC Dr. Lalrozama'n a hman pui. Ṭanpuina hi serthlum chin thlang mi 91, lakhuihthei chin thlangtu mi 34, passion fruit thlangtu mi 34 leh thingpui chin thlangtu mi pakhat hnenah pek a ni a, sum sem zat chu Rs. 8,95,000 a ni.

Training zo

November 2, 2016-a Aizawla sipai lâk rûnpui neih turah Mamit district ṭhalai tam zawk an luh theihna tura buatsaih Army Special Pre-Recruitment Training chu nimin khan 4th IR Bn. hmunah zawh a ni. Training-ah hian ziaka chhàn chi atan leh physical fitness atana pawimawhte ṭhalaite zirtir an ni.

Tlawngah tla hlum

PC Zothansanga (31), Chawlhhmun, Aizawl chu October 20, 2016 tlai dar 3:00 vel khan Tlawng luia Tuithûm lui chhuah thlangah chesualin a tla hlum a, he thu ziah lai thleng hian zawn mek a ni. Thu dawn danin, PC Zothansanga hi Aizawl New Market-a a puanṭhui­puite nen Tlawng luiah intihlimin an kal a; a tlak hlum hnuah nimin khan Aizawl veng hrang hranga mi tlawmngaite'n a ruang an zawng a ni.