Kelek natna chungchang sawiho

India rama kelek (clubfoot) neite enkawltu, CURE International India Trust (CIIT) palaite chuan nimin khan Governor Lt.Gen. Nirbhay Sharma leh chief minister Lal Thanhawla an kâwm a; kelek neite tana hmalak dan tur an sawipui.

CURE hotute hian Larsap hi Raj Bhavan-ah kâwmin, CURE-in Mizorama an hnathawh chu a fakawm a tih thu a lo hrilh a, "Tlawmngai pawl, a bik takin YMA-te nena thawkho a, mipuite hnenah kelek chungchang nasa zawka hrilh pawimawh. Kelek neia piangte chu enkawl hma chuan awlsam taka tihdam leh kea kal an harsatna sutkiansak theih a ni tih mi tam zawkin an hriat loh avangin, keleka piangte chu dam chhunga pianphunga rualbanloin an awm palh thei a, ṭan lakho a ṭul a ni," a ti.

Governor chuan, media hrang hrang bakah, khawlaia lemchan (street play) hmangte pawhin khawpui leh thingtlang khaw lamahte awareness programme nei turin CURE palaite chu a chah.

CURE hruaitute hian CM Lal Thanhawla chu a chenna banglaah an kâwm bawk a; Clubfoot Mizoram leh Health department-te nen kelek chungchanga hma an lak dante hrilhin, Mizoramah naupang 50 velin enkawlna an dawn mek thu sawiin, "Mizorama doctor-te'n naupang kelekte an zai dam dan leh an enkawlnate chu ram pumah a ṭha ber niin kan hria," an ti.

Chief Minister chuan, Clubfoot Mizoramte nen thawhhona chak zawk an neih theih nan leh ram pumah naupang kelekte'n enkawl damna an hmuh zel theih nan duhsakna a hlan.

CURE palaite hi Ningania Aijal Club-a neih zawh tak international seminar-a tel tura rawn kal an ni.