H/S Games-ah Aizawl district champion

34th. Mizoram Secondary School Games 2016 chu nimin khan Rajiv Gandhi Stadium-ah khâr a ni a, a kharna inkhawmah School Education minister H Rohluna khuallian niin, intihsiaknaa ti ṭhate hnenah lawmman a sem. Gold medal 17, silver medal pariat leh bronze medal 10 latu Aizawl district chu pakhatna an ni.

School Education Minister chuan, sikul naupangte'n thluak ṭha leh ngaituahna hrisel an neih theih nan taksa hrisel an mamawh a, taksa hriselna kawnga naupangte chawh phûrna turin school games huaihawt ṭhin a nih thu a sawi a, "Zirna bakah, infiamnaah khawvel huap pawhin sikul naupang leh ṭhalaite tan hlawhtlin theihna kawng a inhawng zau a, a peih leh tumruhte tan chuan khawvel huapa mi hlawhtling nih a har tawh lo," a ti.

H Rohluna chuan, ruih-hlo chu ṭhalaite leh ram leh hnam hmelma a ni tih sawiin, vawi khat tih chhin a pawi tih a sawi a; ruihhlo ti chhin lo tur leh ruihhlo laka fimkhura fihlim turin zirlaite a chah.

Kumin H/S Games-ah hian Kala Utsav 2016 telh nghal a ni a; Kala Utsav-ah hian inelna pali - lâm, rimawi, visual art leh lemchanahte inelna buatsaih a ni. Làmah Champhai district pakhatna an ni a, a dang zawngah Aizawl district pakhatna an ni.

H/S Games leh Kala Utsav-ah hian district pariat aiawh sikul naupang 906 leh zirtirtu 76 an tel a; infiamna chi sarih - athletics, football, badminton, basketball, table tennis, taekwondo leh volleyball-ahte intihsiak a ni. A pumpuiah Aizawl district pakhatna an ni a, Kolasib district leh Champhai district chu pahnihna leh pathumna an ni.

Secondary School Games medal tally

District Gold Silver Bronze Total

Aizawl 17 8 10 35

Kolasib 9 5 6 20

Champhai 6 3 11 20

Lunglei 4 9 6 19

Serchhip 3 7 7 17

Mamit 1 4 3 8

Lawngtlai 1 1 2 4

Siaha 0 4 6 10