Mipui thunun dan tur zirna khâr a ni

Police-te tana buaina a chhuaha dan leh thupek kenkawh leh mipui thunun dan tur zirna, chawlhkar khat awh '1st Batch Intensive Training on Maintanance of Law & Order, Riot Drill and Crowd Control' chu nimin khan 2nd Bn. MAP hmun, Lungleiah khâr a ni a, DIG (Southern Range) Joseph Lalchhuana'n a hmanpui.

Joseph Lalchhuana chuan, police-te chu dan kengkawhtu an nih angin dan bawhchhetute an thunun a ṭul thu a sawi a, "Training reng rengah hian thiamna thar puakchhuah rualin rilru a pawimawh. Training neih hnuah pawh training hmaa rilru ngai ang kan la pu reng a nih chuan training a hlawhtling lo tihna a ni," a ti.

Dan leh thupek kenkawhnaah ṭhiante'n kut an tawrh laiin engmah ti loa awm mai mai an awm ṭhin avangin Mizoram Police-te intuaithar an ngaih thu sawiin DIG chuan, "Police nihnaah hian kan rinawm tur a ni a, inpekna leh rilru thar kan put a ngai," a ti a;
ṭha taka hna thawh a nih chuan mipui pungkhawm venhim theih a nih tur thu a sawi.

Lunglei SP Zosang-liana pawhin thu sawiin, "Tun hnaia Lunglei leh Siahaa thil thleng vangin police-te tan mipui thunun a ngaihzia a hriat. Police chuan kan uniform hian tih theih a nei a ni tih kan hriat a, a ṭul dan ang zela hman thiam a pawimawh," a ti.

Training-ah hian mi 92 an tel a; 2nd. Bn. MAP aṭangin mi 51, Lunglei DEF aṭangin mi 37, Lawng-tlai DEF aṭangin mi pahnih leh Siaha DEF aṭangin mi pahnih an ni.