KHAWTHLIR

India Republic Day vawi 71-na chu naktuk hian India ram hmun dang rualin Mizoramah pawh lawm a ni dawn a, Ai­zawlah chuan zing dar 7-ah Governor PS Sreedharan Pillai hoa lawm a ni ang. Chhun dar 12-ah sawm bikte tan Raj Bhavan-ah Governor at Home buatsaih a ni ang.

Champhai district Special Summary of Photo Electoral Roll 2020 kalpui mek chung-changah nimin khan Champhai district tana observer Lalthangpuia Sailo hoin Champhai DC conference hall-ah official-te an ṭhukhawm. Nimin thleng khan vote nei thar tura diltu mi 3,022 zinga 2,600-te dilna pawmsak an ni tawh.

Nizan aṭang khan hmun hrang hrangah pastor bial KṬP conference hman ṭan a ni a, Pathianni zanah a ṭiak ang. Bial KṬP conference-ah hian vawiinah rorel inkhawm neih a ni ang.

Region Higher Secondary School, Lawngtlai NSS unit chuan nimin khan an sikulah blood donation camp an huaihawt a, Lawngtlai District Hospital tan thisen unit 53 an pe a, a petute mipa 29 leh hmeichhia 24 an ni.

Nimin khan Kolasib DC Sangchhin Chinzah hoin DC conference hall-ah Krismas leh kumthar hman dan sorkar official leh khawtlang hruaitute'n an thlirlet a, harsatna lian tham a awm loh thu leh boruak muanawm tak hnuaia hunpui hman a nih thu tarlan a ni. DC chuan khawtlang hruaitute inpekna leh sorkar an ṭawiawmnaah lawmthu a hrilh.

Auxiliary Nurse Midwife (ANM) School, Lawngtlai chuan a vawi khat nan nimin khan an auditorium-ah third batch zirlaite lukhum khumtirna leh khawnvar chhia thutiam lakna hun, Capping and Lamp Lighting Ceremony an buatsaih a, Lawngtlai chief medical officer Dr Lalthlamuana'n a hmanpui.  Lawngtlai District Hospital-a nursing superin­tendent Lalrintluangi'n zirlai thar 19-te chu lukhum khumtirin thutiam a lâktir a ni.