International Museum Day pualin Mizoram State Museum hawn a ni

Mizoram State Museum chuan International Museum Day (May 18) pualin nimin khan a duh apiang tan a thlâwna tlawh theihin State Museum an hawng a, mi ṭhahnem takin an tlawh.

State Museum hi nimin khan mi 870-in an tlawh a, chungte chu zirlai 790 leh puitling 80 an ni a; zirlaite hnenah Mizoram State Museum chuan ei leh in tur an sem.

International Museum Day hi kum tin May 18-ah hman ṭhin a ni a, kuminah chuan Pathianni a nih avangin Mizoram State Museum chuan nimin khan an hmang a; kumina thupui chu 'The future of museums in rapidly changing communities' tih a ni.

Mizoram State Musuem-ah hian gallery parukah thil pho chhuahna (showcase) 100 a awm a, chu'ngah chuan thil chi hrang hrang (museum object display) 732 dah a ni. Reserve collection-ah thil 3,218 dahṭhat a ni a; showcase-a pho chhuahte leh dahṭhatte chu a vaiin thil chi hrang hrang 3,950 a ni.