MNF signatory Zoramthanga a thi

Kum 1966-a MNF-in Mizoram independence an puannaa hming ziaktu (signatory) zinga mi leh MNF adviser ni mek Zoramthanga (94), Chhinga Veng chu nimin zing dar 1:17 khan a thi a, nimin vek khan vui a ni.

MNF party chuan nimina Mizo Hnam Rûna chhung inkhawmah signatory Zoramthanga sûnna hun an hmang a, sûn nan minute khat chhung ngawi rengin an ding.

Sûnna hun kaihruaitu MNF vice president Lalchhandama Ralte chuan, "MNF leh Mizo hnamin hnam pasalṭha signatory 61 zinga mi kan chân hi a pawi hle. Tun dinhmunah signatory parukin min la dampui a ni," a ti.

Lalchhandama Ralte chuan, MLA inthlan lo awm leh turah MNF chu mipuiin sorkarna siam turin an beisei hle niin a sawi a; party inkaihhruaina siam thar a nih angin boruak tichhe thei zawnga ke pên lo tur leh party social media pawh thiam taka hmang turin party mipui a chah a ni.